I mituri 8-vjeçar që u vra barbarisht nga 38-vjeçari Klodian Çalamani do të përcillet sot në banesën e fundit. Familja Vasiu në fshatin Grecalli të Fierit ka hapur dyert e mortit për djalin e tyre.
Përballë dhimbjes që po përjeton daja i 8-vjeçarit apelon dënimin maksimal për vrasësinë e mikut të tij, por ky apel shoqërohet nga mungesa e besimit në strukturat e drejtësisë, teksa thekson se autori do të dalë sërish nga burgu për të bërë të njëjtën gjë.
“Apeli im më i madh është që të varet në mes të Fierit. Shteti do ta nxjerrë prapë, po të njëjtën do të bëjë. Nuk di gjë fare akoma. Unë jam nga Durrësi, jam daja,” shprehet ai.
Mbrëmjen e djeshme, daja tjetër i 8-vjeçarit, në një prononcim për mediat, me lot në sy ka treguar momentin kur mori vesh lajmin e rëndë. Ai thotë se do të kërkojë drejtësi pasi në të kundërt do ta “varrë autorin e krimit si qen”.
“Është nipi im. Mbrëmë më ka treguar motra. Nuk e dija që ishte i dhunshëm, më ka treguar motra që është dënuar më përpara. Ky është shteti, çfarë të bëjmë? Do të kërkojmë drejtësi…Do ta varim si qen!” tha daja i viktimës, që sapo ishte kthyer nga Italia.
Autori njihej nga banorët e zonës si një person problematik pasi konsumonte pije alkoolike. Vetë Çalamani ka pranuar krimin e rëndë, ndërsa vijojnë hetimet për zbardhjen e plotë të ngjarjes.
Discussion about this post