Nga dita e sotme hyjnë në fuqi masat e reja anti-covid për të gjithë ata që duan të shkelin në territorin e Kosovës. Sipas të dhënave të publikuara nga Ministria për Evropën dhe Punët e Jashtme, të gjithë personat që dëshirojnë të hyjnë në territorin e Republikës së Kosovës, duhet të paraqesin: Certifikatën e vaksinimit të plotë kundër COVID-19; Dëshminë që keni kaluar COVID-19: test RT-PCR pozitiv i lëshuar jo më pak se 21 ditë dhe jo më vonë se 180 ditë; Testi RT-PCR negativ, jo më të vjetër se 72 orë; Test i shpejtë antigjen negativ jo më të vjetër se 48 orë.
Ndërsa, për shtetasit e Republikës së Kosovës, si dhe personat me leje qëndrimi të përkohshëm ose të përhershëm në Kosovë, të cilët hyjnë në Republikën e Kosovës, në rast se nuk posedojnë një nga dokumentet e mësipërme, duhet të vetë-izolohen për 7 ditë.
Këto persona duhet të plotësojnë një deklaratë për vetë-izolim në pikën kufitare përkatëse. Nga këto rregulla përjashtohen: Personat të cilët hyjnë në Kosovë përmes aeroportit apo përmes pikave kufitare tokësore dhe largohen nga Kosova brenda 3 orësh; Shtetasit e Republikës së Kosovës që kanë dalë jashtë Kosovës në 12 orët e fundit; Personat nën moshën gjashtëmbëdhjetë (16) vjeç.
