Kapërceu murin e burgut dhe u zhduk, dalin emri dhe detajet e arratisjes së shqiptarit në Itali
Janë zbuluar detaje të reja mbi arratisjen e bujshme nga burgu i Brindisit në Itali, ku protagonist ishte një 23-vjeçar me origjinë shqiptare.
Media italiane La Repubblica që citon noa.al, raporton se i riu quhet Xhuljano Quku, i dënuar për trafik droge dhe kundërshtim të një zyrtari publik. Ai po vuante një dënim prej katër vitesh në burgun e Brindisit.
Sipas rindërtimit të ngjarjes, arratisja ndodhi mëngjesin e së enjtes. Në momentin e hapjes së oborrit të shëtitjes, 23-vjeçari ka kapërcyer murin që rrethon zonën e ajrimit dhe më pas është ngjitur mbi murin e jashtëm të sigurisë, duke arritur të largohet nga institucioni penitenciar.
Arratisja vuri menjëherë në alarm autoritetet italiane, të cilat nisën një operacion të gjerë kërkimi në provincën e Brindisit.
Megjithatë, liria e tij zgjati vetëm pak orë. Pas kontrolleve intensive, forcat e policisë arritën ta lokalizonin dhe arrestonin në zonën e Latianos, pranë banesës së të fejuarës së tij.
Sipas mediave italiane, hetuesit kishin përqendruar kërkimet pikërisht mes Latianos dhe Mesagnes, qytet ku Quku jetonte përpara arrestimit.
Pas arrestimit, 23-vjeçari u rikthye në burg, ku përveç dënimit ekzistues do të përballet edhe me akuza të reja për arratisje.
Ndërkohë, arratisja ka ndezur debat në Itali lidhur me kushtet e sigurisë në burgun e Brindisit. Sindikata e Policisë Penitenciare (SAPPE) ka denoncuar mungesën e personelit dhe mbipopullimin e institucionit.
Sipas sindikatës, në momentin e arratisjes polici i shërbimit ishte i detyruar të mbikëqyrte disa sektorë njëkohësisht, përfshirë edhe zona me të burgosur nën mbikëqyrje të lartë.
SAPPE pretendon se në burgun e Brindisit ndodhen rreth 270 të burgosur, ndërsa numri i efektivëve është vetëm 120, situatë që sipas tyre rrezikon seriozisht sigurinë e institucionit. Për këtë arsye, sindikata ka paralajmëruar se do të depozitojë kallëzim pranë prokurorive në rajonin e Pulias për mungesën e personelit dhe kushtet e vështira në burgje.
Xhuljano Quku
gijotina.com/
Discussion about this post