I ndoqën deri te shtëpia, si u organizuan autorët për atentatin në Milot

Autorët e dyshuar se janë porositur për të kryer atentatin e djeshëm në Milot kanë ndjekur çdo lëvizje të Klisman Reçit dhe Ylli Brahimit.

Nga hetimet dhe raportimet e deritanishme të gijotina.com dyshohet se autorët kanë pritur në katin e parë të pallatit ku jetonte Ibrahimi dhe kanë pritur derisa dy shokët të ktheheshin nga lokali ku po pinin kafe që të hapnin zjarr.

Sapo makina e shënjestrave iu afrua për të hyrë në rrugën e pallatit, dolën dy atentatorët dhe qëlluan me breshëri plumbash në drejtim të makinës. Duke qenë se mjeti ishte i blinduar, njëri prej tyre është afruar tek xhami dhe ka qëlluar në distancë të afërt dhe me pas ata janë larguar me automjetin tip Audi. Para ngjarjes Ylli Brahimi dhe Klisman Preçi kishin qenë në një lokal në qendër të Milotit disa metra larg banesave të tyre dhe siç duket atentatorët i kanë ndjekur lëvizjet e tyre.

Plani i tyre dyshohet se ishte ekzekutimi i Ibrahimit por i vdekur ka mbetur Klisman Reçi. Megjithatë nuk përjashtohet as mundësia që atentati të jetë organizuar për të dy personat pasi të dy rezultojnë me precedentë të theksuar kriminal.