Izraeli njoftoi zgjerimin e operacioneve ushtarake në Gaza, që po shoqërohet me një evakuim në shkallë të gjerë të popullësisë.
Ministri izraelit i Mbrojtjes, Israel Katz ka bërë të ditur se ushtria do të pushtojë “zona të mëdha” të territorit. Në një deklaratë, Katz tha se operacioni i zgjeruar kishte për qëllim “shkatërrimin dhe pastrimin e zonës nga terroristët dhe infrastrukturën terroriste”. Mes të tjerash sipas tij ky zgjerim i ofensivës dhe presioni ushtarak është mënyra e vetme për të rikthyer 59 pengjet e mbetura dhe për t’i dhënë fund luftës.
Ushtria izraelite raportohet se nisi operacionet tokësore në Rafah dhe Khan Younis gjatë natës duke vrarë dhjetëra persona e duke plagosur disa të tjerë. Paralajmërimet nga forcat izraelite janë lëshuar më herët në jug të Gazës për banorët që jetojnë rreth Rafah dhe Khan Younis, duke u thënë atyre të lëviznin në zonën Al-Mawasi në breg, të përcaktuar më parë një zonë humanitare.
Ndërsa operacioni në Gaza është përshkallëzuar, Izraeli ka goditur gjithashtu objektiva në Libanin jugor dhe Siri, duke rritur tensionet. Nga ana tjetër, katër persona janë raportuar të vrarë në sulmet e Shteteve të Bashkuara në rajonin Hodeidah të Jemenit, sulmet më të fundit vdekjeprurëse kundër forcave Houthi.
Mediat lokale raportuan se rajoni Hajjah në veriperëndim dhe Saada në veri ishin sulmuar gjithashtu. Pentagoni ka njoftuar gjithashtu se do të rrisë numrin e aeroplanmbajtësve amerikanë të vendosur në Lindjen e Mesme në dy.
Më shumë se 60 njerëz janë vrarë në Jemen që kur Uashingtoni filloi një ofensivë ushtarake më 15 Mars kundër forcave Houthi. Grupi i armatosur jemenas ka kërcënuar se do të kryejë sulme ndaj anijeve të lidhura me Izraelin në Detin e Kuq, në përgjigje të prishjes së armëpushimit në Gaza.
Discussion about this post