Katër persona janë vënë në pranga dhe tetë të tjerë janë shpallur në kërkim në kuadër të një operacioni të zhvilluar prej një viti në vendin tonë, ku një grup personash krijonin biznese fiktive dhe mashtronin klientët me pagesat online.
Në kuadër të operacionit të koduar “PHISHING”, janë arrestuar dy shtetas të huaj dhe dy shqiptarë të cilët në bashkëpunim me njëri tjetrin kishin organizuar një skemë mashtrimi onlinë, ku kanë marrë miliona euro. Të arrestuarit janë Donald Anu, 34 vjeç, shtetas i Kamerunit, alias Ugochukëu, Emmanuel Emereibenu 39 vjeç, shtetas i Nigerisë; Marie Goufan, 31 vjeçe, shtetase Kamerune, banuese në Tiranë, Fatbardh Danja, 40 vjeç, banues në Tiranë dhe Xhentil Kupe, 54 vjeç, banues në Tiranë.
Në një konferencë për mediat drejtuesja e Prokurorisë së Tiranës, Elisabeta Imeraj ka dhënë detaje në lidhje me funksionimin e kësaj skeme mashtrimi ku duket se të arrestuarit dhe 8 të tjerët e shpallur në kërkim ndërhynin në sistemet elektronike të kompanive të ndryshme dhe mashtronin klientët e tyre.
Të arrestuarit dhe bashkëpuntorët e tyre arrinin që të futeshin në sistemin kompjuterik dhe rrinin në heshtje deri në momentin që kanë parë kërkesa specifike në lidhje me fonde ose pagesa të ndryshme. Sapo konstatonin ndonjë kërkesë të tillë ato kontaktonin klientin, duke marrë rolin e subjektit pritës të fondeve, duke i informuar ata se detajet bankare të kompanisë kanë ndryshuar dhe duke kërkuar që ata të transferojnë fondet në llogarinë e re.
