Kryebashkiaku i Nju Jorkut, Eric Adams ka folur ditën e sotme dhe ka thënë fjalët më të mira për komunitetin shqiptar atje.
“Jeni njujorkezët më të mirë, punëtorë të palodhur, ju konsideroj si motrat dhe vëllezërit e mi”.
Nga ana tjetër, senatori Shumer flet shqip duke thënë se jemi më e mira e Amerikës.
“Jeni më e mira e Amerikës”
Gjithashtu, Adams nuk i ka kursyer edhe vlerësimet për komunitetin shqiptar, që punon dhe jeton në Shtetet e Bashkuara të Amerikës. Gjatë ceremonisë së emërtimin të njërës prej rrugëve te Nju Jorkut me emrin e Heroit tonë Kombëtar, Gjergj Kastrioti Skënderbeu, Adams i veçoi ata si njujorkezë të mirë, që punojnë me përkushtim.
“Po flas për njujorkezët e mirë, për ata që kontribuojnë në qytetin tonë, që nuk flasin për të luftuar policinë, por si ta ndihmojnë atë. Kur flas për njujorkezët e mirë, e kam fjalën për komunitetin e shqiptarëve. Ju përfaqësoni njujorkezët e mirë, punëtorë të palodhur, të përkushtuar dhe të devotshëm, që besojnë te siguria publike dhe në jetën cilësore që meritojmë si qytet. Ky emërtim rruge, ku gjithkush që do të kalojë nëpër të, do të ngrejë kokën lart dhe do të shohë emrin, do të tregojë atë që ju e konsideroni lider, një hero, ai është emri që po i vendosim kësaj rruge. Është kaq domethënëse për ta njohur dhe për ta respektuar në një qytet, të cilin ju e keni bërë kaq të madh sa është. Zoti Veliaj, ju falenderoj që jeni këtu mes nesh, teksa emërtojmë këtë rrugë të rëndësishme dhe i them të gjithë miqve të mi të komunitetit shqiptar: Unë nuk ju konsideroj thjesht shtetas, por si vëllezërit dhe motrat e mia”.
Një moment i veçantë ishte fjalimi i liderit të mazhorancës në Senatin amerikan, Chuck Shumer, i cili ka dhënë një kontribut të rëndësishëm në karrierën e tij për çështjen shqiptare.
“Ju dua shumë! E dua komunitetin tuaj sepse ju jeni më e mira e Amerikës! Shumë njerëz kanë ardhur këtu në vitet ’50-’60-’70, gjithçka donit të bënit ishte të punonit fort dhe të siguronit një jetë të mirë për veten dhe për fëmijët tuaj. Dhe ju ia dolët! Në pallatin tim kemi një burrë, një shqiptar të mrekullueshëm, që filloi pune si portier dhe tani zotëron 8 pallate. Kjo është historia shqiptare! Ndaj, ta shohësh këtë komunitet të rritet dhe të ketë progres, fillon të besosh tek Nju Jorku dhe të besosh tek Amerika”.
Discussion about this post