Në një nga protestat më të mëdha në Jerusalem deri më sot, dhjetëra mijëra njerëz u mblodhën jashtë rezidencës së kryeministrit Benjamin Netanyahu, duke kërkuar përfundimin e luftës në Gazë.
Forumi që përfaqësonte familjet e pengjeve të mbajtura nga Hamasi në Gazë i bëri thirrje kryeministrit Netanyahu që të dërgonte menjëherë një ekip negociator për të diskutuar përfundimin e luftës dhe sigurimin e lirimit të të gjithë pengjeve.
Propozimi i paraqitur nga ndërmjetësit përfshin një armëpushim 60-ditor, gjatë të cilit fillimisht 10 pengje të gjallë do të shkëmbeheshin me të burgosur palestinezë.
Në një deklaratë të veçantë, Hamasi tha se ishte i hapur për “çdo ide dhe propozim” që mund të çonte në një armëpushim të qëndrueshëm, në një tërheqje të plotë të Izraelit nga Gaza, në shpërndarjen e ndihmës humanitare dhe në shkëmbimin e pengjeve për të burgosurit palestinezë përmes negociatave të ndërmjetësuara.
Megjithatë, Netanyahu ka këmbëngulur në një marrëveshje gjithëpërfshirëse në të cilën të gjithë pengjet do të lirohen menjëherë. Nga 48 pengjet që janë ende në Gazë, autoritetet izraelite thonë se 20 prej tyre janë gjallë.
Mbetet e paqartë nga deklarata e Hamasit nëse grupi do të pranonte të lironte të gjithë pengjet e mbetura menjëherë.
Kryeministri Netanyahu po bën gjithashtu presion për dorëzimin dhe çarmatimin e Hamasit dhe dëshiron që Izraeli të mbajë kontrollin e Gazës.
Sipas transmetuesit izraelit Kan, shtetet ndërmjetëse – SHBA-ja, Katari dhe Egjipti – pritet të paraqesin një propozim të ri këtë javë – për një marrëveshje që do të siguronte lirimin e të gjithë pengjeve dhe do t’i jepte fund luftës.
Discussion about this post