Një 80-vjeçar italian është dënuar me 3 vite e 3 muaj burg nga Gjykata e Leçes, pasi u shpall fajtor për keqtrajtim në familje dhe plagosje ndaj bashkëshortes së tij shqiptare dhe dy fëmijëve të saj.
Vendimi u dha nga Seksioni i Parë Penal i Gjykatës, e cila vendosi gjithashtu ndalimin e të dënuarit nga ushtrimi i funksioneve publike për pesë vite.
Për viktimat u caktua edhe një dëmshpërblim paraprak prej 25 mijë eurosh për gruan dhe djalin e saj të mitur, ndërsa 10 mijë euro për vajzën madhore.
Sipas hetimeve, 80-vjeçari nga Presicce-Acquarica, në provincën e Leçes, kishte sjellë në Itali gruan shqiptare dhe dy fëmijët e saj nga një lidhje e mëparshme, duke u premtuar një jetë më të mirë dhe siguri ekonomike. Por, sipas akuzës, pas mbërritjes në Itali, familja u përball me një situatë të rëndë dhune, frike dhe izolimi.
Për rreth katër vite, nga viti 2017 deri në maj të vitit 2021, gruaja dhe fëmijët dyshohet se kanë qenë nën kontrollin e vazhdueshëm të të moshuarit, i cili ushtronte dhunë fizike dhe psikologjike, i kërcënonte dhe u kufizonte lirinë.
Sipas dosjes hetimore, viktimat detyroheshin të punonin duke pastruar apartamente që jepeshin me qira, ndërsa fëmijëve u pengohej edhe ndjekja normale e shkollës.
Një nga episodet më të rënda daton në vitin 2017, kur djali, vetëm 6 vjeç, dyshohet se u godit dhe u përplas pas një kaloriferi, duke pësuar dëmtime në kokë që kërkuan trajtim në spital. Edhe vajza më e madhe raportohet se ka qenë viktimë e dhunës dhe kërcënimeve.
Hetimet nisën pasi gruaja dhe vajza e saj iu drejtuan disa herë urgjencës me dëmtime që ngritën dyshime për abuzim në familje. Pas verifikimeve, autoritetet zbuluan një histori të gjatë dhune, e cila përfundoi me dënimin e 80-vjeçarit.
Discussion about this post