Kina dhe Rusia u zotuan se do të forcojnë partneritetin, pavarësisht presioneve të mundshme nga perëndimi. Gjatë një vizite në Moskë, diplomati kinez Wang Yi tha se dy vendet mbeten të përkushtuara në një botë pa hegjemoni. Deklaratat vijnë pak ditë pasi sekretari amerikan i shtetit paralajmëroi se Kina do furnizojë rusinë me armë që do të përdoren në Ukrainë.
Vetëm 2 ditë pasi SHBA-ja dha alarmin se Pekini po planifikon furnizimin e Rusisë me armë e municione që mund të përdoren në Ukrainë, kryediplomati i Kinës VVang Yi mbërriti në Moskë.
Ai u prit nga presidenti Vladimir Putin, nga ku tha se raporti strategjik mes vendeve nuk do të ndikohet nga presionet e jashtme.
“Vendet e tjera nuk mund të bëjnë presion ndaj Kinës dhe Rusisë. Pekini është i gatshëm të forcojë partneritetin me Moskën në interes të dy vendeve dhe të gjithë botës”- deklaroi ai.
Për kryediplomatin kinez, mardhënia mes dy shteteve është dinamike e se dy superfuqitë janë në bashkëpunim të vazhdueshëm për ta forcuar atë me marrëveshja të reja.
“Rusia dhe Kina mbeten të vendosura dhe të përkushtuara ndaj një bote shumëpolare pa hegjemoni,” i tha ai ministrit të jashtëm rus, Sergei Lavrov.
Kryediplomati kinez vizitoi Moskën, ndërsa tensionet po rriten në prag të 1 vjetorit të nisjes së luftës në Ukrainë.
Ndërkohë, një ditë pas deklaratës së presidentit Putin, të mërkurën duma ruse votoi pezullimin e pjesëmarrjes së Rusisë në traktatin e armëve bërthamore “Nevv Start” me Shtetet e Bashkuara. Marrëveshja u nënshkrua në 2010, nga dy presidentët e kohës Barack Obama dhe Dmitry Medvedev për të parandaluar luftën bërthamore.
Nga ana tjetër presidenti amerikan Joe Biden po takohet në Varshavë me krerët e vendeve të krahut lindor të NATO-s, dy ditë pas vizitës së papritur në kryeqytetin e Ukrainës.
Discussion about this post