Në një intervistë për Zërin e Amerikës, kreu i SPAK, Arben Kraja tha se çështja e aferës së inceneratorëve është në hetim. Sipas tij, kjo është diçka shumë komplekse, pasi janë të përfshira disa institucione. Sipas Krajës, hetimet do të vazhdojnë deri në fund edhe për inceneratorin e Tiranës dhe do të përgjigjet çdo zyrtar i lartë që ka shkelur ligjin.
“Çështja e inceneratorëve është komplekse sepse janë përfshirë shumë institucione që kanë qenë pjesë e këtij aktiviteti është një volum i madh pune. Ne kemi 3 hetime penale për tre inceneratorë, Elbasanin, Fierin dhe Tiranën. Për dy të parët në kemi arritur disa konkluzione, që janë publike. Kemi ngritur përgjegjësi penale për disa persona, përfshire edhe zyrtarë, dhe hetimet për inceneratorin e Tiranës do të vazhdojnë deri në fund për të sqaruar se çfarë ka ndodhur dhe do përgjigjet kushdo që ka shkelur ligjin” – tha Kraja.
I pyetur në lidhje me pronarët e kompanive të cilët u larguan para daljes së urdhërarresteve, Kraja sqaroi se ndonjëherë kur kërkohen nuk kapen sepse fshihen.
“Kjo është çështje e hetimit që duhet sqaruar. Problemi është se janë qytetarë të lirë dhe derisa del një masë sigurimi ata janë të lirë. Mund të jenë edhe jashtë vendit. Ndonjëherë kur kërkohen nuk kapen sepse fshihen. Është pjesë e hetimit, por kjo nuk na pengon që të vazhdojmë hetimin”.
Discussion about this post