Kryedemokrati Sali Berisha thotë se Joy Aoko, e reja nga Kenia që ndërroi jetë është vrarë. Në një konferencë të përjavshme me gazetarët, Berisha tha se ky krim do të zbardhet shumë shpejt. Ai shtoi se ngjarja është mbajtur e fshehtë, por nuk përmendi asnjë emër.
“Kush e vrau vajzën nga Kenia? Kush e fshehu krimin. E vërteta do të dalë dhe kjo gjë do të dalë shumë shpejt. Këta janë të inkriminuar, por e vërteta do të zbardhet,”- tha Berisha.
Joy Aoko ndërroi jetë në Kenia, ku u transportua në gjendje kome, disa muaj pasi ndodhej e shtruar tek Trauma. Joy ndodhej e shtruar në spital që prej 14 gushtit të vitit 2022. 22-vjeçarja kishte ardhur në Shqipëri për të punuar në një kazino, por në gusht të vitit të kaluar, u gjet buzë godinës ku jetonte prej muajsh. Dyshimet paraprake ishin se e reja kishte rënë nga dritarja, por nga ekzaminimet e mëtejashme u vërtetua se ishte dhunuar e me shumë mundësi përdhunuar e më pas lënë ne derën e rezidencës ku jetonte.
Oficerët e policisë kanë ripyetur disa persona për të sqaruar paqartësi apo mospërputhje mes deklarimeve të tyre dhe pamjeve të kamerave të sigurisë në zonë. E para që u ripyet ishte shoqja e dhomës se 22-vjeçares e cila është nga Gana. Po ashtu janë pyetur edhe stafi i kazinosë dhe shoferi që e transportoi 22-vjeçaren në rezidencë pak orë para se të gjendej nga banorët jashtë rezidencës në gjendje të rëndë. Deri më tani s’ka asnjë person në pranga të lidhur me ngjarjen.
Discussion about this post