Një operacion i rrallë dhe me masa ekstreme sigurie është zhvilluar në orët e para të mëngjesit të 15 janarit, ku 15 të burgosur me rrezikshmëri tepër të lartë janë transferuar nga Burgu i Durrësit drejt IEVP Peqin, institucioni që konsiderohet aktualisht si më i sigurti në vend.
Lulzim Berisha, Orges Molla, Juxhin Koka, dy shtetas brazilianë dhe një nga Venezuela janë mes 15 të burgosurve me rrezikshmëri të lartë që u transferuan në orët e para të mëngjesit të 15 janarit 2026 nga Burgu i Durrësit drejt IEVP Peqin, burgut të sigurisë së lartë.
Burime bëjnë me dije se mes të burgosurve që u transferuan janë edhe ata që janë arrestuar gjatë Operacionit ‘Ura’ dhe Revansh.
Vendimi për zhvendosjen masive të të burgosurve me rrezikshmëri të lartë u mor menjëherë pas arratisjes së Altin Ndocit nga Spitali i Durrësit, një ngjarje që tronditi sistemin e sigurisë së burgjeve dhe nxori në pah nevojën për riorganizim të menjëhershëm.
Në fokus të operacionit ishin personat me rrezikshmëri të lartë që deri tani qëndronin në Burgun e Durrësit, i njohur ndryshe edhe si “burgu i VIP-ave”, për shkak të kushteve dhe profilit të disa prej të dënuarve. Fillimisht ishte paralajmëruar që një pjesë e tyre të transferoheshin drejt burgut të Fierit apo institucioneve të tjera, por më të rrezikshmit u përzgjodhën të sistemohen në Peqin, i cili disponon seksion të posaçëm të sigurisë së lartë dhe kontroll maksimal.
Sipas burimeve jo zyrtare, 206 të dënuar dhe paraburgosur të Burgut të Durrësit janë kaluar në një proces vlerësimi për nivelin e rrezikshmërisë. Një ditë më parë, Ministri i Drejtësisë, Besfort Lamallari, urdhëroi hartimin e një plani të ri kombëtar rishpërndarjeje, duke i ndarë të burgosurit sipas rrezikut shoqëror.
Pika kyçe e këtij urdhri ishte largimi i të gjithë personave me rrezikshmëri të lartë nga burgu i Durrësit dhe sistemimi i tyre në një nga shtatë burgjet e sigurisë së lartë që funksionojnë në Shqipëri.
Deri para këtij vendimi, në një seksion të veçantë të Burgut të Durrësit ndodheshin 27 persona me rrezikshmëri të lartë, pjesë e një totali prej 54 të dënuarish dhe 152 paraburgosurish. Arratisja e Altin Ndocit, i akuzuar për disa krime të rënda, shërbeu si katalizator për vënien në lëvizje të këtij operacioni të gjerë.
Aktualisht, në Shqipëri funksionojnë 20 institucione të vuajtjes së dënimit, prej të cilave 7 kanë seksione të sigurisë së lartë, ku tashmë po përqendrohen elementët më problematikë të botës së krimit.
Discussion about this post