Tetori është muaji rozë, muaji i sensibilizimit kundër kancerit të gjirit. Një sëmundje që prek vajza e gra të të gjitha moshave dhe beteja më të është shumë e vështirë të fitohet, veçanërisht nëse sëmundja kapet në stade të avancuara. Një grua ka vendosur të rrëfejë luftën me sëmundjen si një formë ndërgjegjësimi dhe apelimi për të gjitha gratë, që të ekzaminohen për të kapur dhe kuruar në stade të hershme kancerin.
Një zonjë, rreth 60 vjeçe tregon se përveç dhimbje të forta, gjendja ekonomike ia vështirëson barrën pasi nuk arrin të sigurojë medikamentet e nevojshme. E moshuara tregon se me pensionin që merr ajo dhe burri i saj nuk përballohen dot nevojat bazike dhe jo më shpenzime kaq të larta shëndetësore. Ajo thotë se asnjëherë nuk ka marrë mbështetje nga shteti por vetëm nga të afërmit që jetojnë jashtë Shqipërisë.
“Në bazë të analizave që bëra në Tiranë fillova kimioterapinë dhe sot e kësaj dite i vazhdoj. Janë të shtrenjta, por motra në Angli dhe vajza në Amerikë më ndihmojnë për kostot, nëse nuk do kisha ato do kisha vdekur. Unë dhe bashkëshorti jemi pensionistë dhe nuk e përballojmë dot me këto të ardhura të pakta”, tha ajo.
Ndonëse e sëmurë dhe me shumë vështirësi që po përballet njëkohësisht, zonja nuk harron të falenderojë ata pak njerëz që po kujdesen për të. “Dua të falënderoj dhe mjeken e kimioterapisë , doktorin që më operoi sepse kanë bërë punë në mënyrë të përsosur dhe janë përkujdesur për mua.”
E prekur, teksa tregon vuajtjet, e moshuara iu bëri thirrje qytetarëve që të sensibilizohen dhe t’iu qëndrojnë pranë vajzave dhe grave që preken nga kjo sëmundje.
“Iu bëjë thirrje të gjitha vajzave dhe grave, sidomos atyre mbi 45 vjeç të bëjnë sa më shumë vizita dhe kurrë të mos frikësohen. Ne si njerëz duhet të sensibilizohemi dhe të mos fokusohemi vetëm te puna. Kur unë u diagnostikove me këtë sëmundje, ishte goditje e madhe pasi edhe vëllanë e kam humbur nga kjo sëmundje. Ishte tronditje e madhe. Kisha nevojë shumë për mbështetje morale”, u shpreh ajo.
Në vendin tonë numri i grave me kancer ka ardhur në rritje dhe ajo çka e vështirëson më tepër situatën në tërësi është fakti se sëmundja kapet në stade të avancuara duke e bërë të pamundur që pacientja të fitojë betejën. Nëse kanceri kapet në stadet e para, shanset për ta mundur atë janë më të mëdha.
