Biznesmeni i preferuar i Partisë Socialiste dhe kryeministrit Edi Rama, Gjergj Luca ka reaguar pasi u vendos në qendër të kritikave nga opinioni publik për etiketimin që përdori ndaj fermerëve që protestojnë për të drejtat e tyre.
Në një intervistë të regjistruar në restorantin e tij, të ideuar nga vetë ai, Luca ka vendosur që të sqarojë termin ‘barbonë‘ të cilin e përdori një ditë më parë për fermerët.
Në një video disa minutëshe, Luca thotë se i qëndron plotësisht të gjitha gjërave që ka thënë, ndërsa shtoi se është keqinterpretuar për termin ‘barbon’, pasi sipas tij, ishte termi ‘barbun‘ që u tha nga ai.
“I qëndroj plotësisht të gjithë gjërave që unë jam shprehur në kuadër të buxhetit të peshkimit. Më vjen keq vetëm për një keqinterpretim të mediave që mesa duket mezi kanë pritur që unë të dal, që të kapin dhe të shkëpusin shprehje të ndryshme për të krijuar sa më shumë lajme. Shprehimisht për fjalën barbon, unë kam thënë barbun. Mund ta dëgjojnë 100 herë, unë nuk mund t’i them barbon vetes time, se unë jam një nga ata njerëz. Ata janë fermerë në tokë, unë jam fermer në det. Bile profesioni ynë është më i vështirë se i tyre. “Barbunë” nga “barbonë” është një diferencë shumë e madhe dhe unë jam mësuar cik me mediat të sillen në këtë mënyrë me mua”, tha Luca.
Më tej, ai sqaroi kuptim e fjalës “barbunë”, që sipas interpretimit të tij është për ata persona që fshihen në dunat e rërës.
“Ne barbunin e përdorim për një specie që reagon në mënyrë të çuditshme për ta kapur, të gjithë peshqit o devijojnë majtas o djathtas o lart o poshtë, ndërsa barbuni mundohet të fshihet në ato dunat e vogla të rërës që janë shumë të vogla, ne shpesh herë etiketojmë personazhe të ndryshme rreth nesh me këto fjalë. Mua më ka bërë ta ndjej veten keq, faleminderit që më lejon ta sqaroj para kolegëve të mi fermerë”, shprehet ai.
Kjo deklaratë fyese u bë nga Luca ditën e djeshme, ku po bëhej prezantimi i buxhetit 2022 për sektorin e peshkimit nga kryeministri Edi Rama dhe ministrja Frida Krifca, të cilët nuk patën asnjë reagim nga ana e tyre. Kjo indiferencë solli dhe revoltën e fermerëve, të cilët i dërguan një kërkesë zyrtare kryeministrit Rama që të distancohet nga ofendimet që u bënë.
Discussion about this post