Gjyqtari penal i Guajakilit, Ángel Tapia, u arrestua më 13 mars 2026 në veri të qytetit nën dyshimet për ndikim të paligjshëm dhe lidhje të mundshme me struktura të krimit të organizuar, përfshirë një rrjet të njohur si pjesë e mafies shqiptare në Ekuador. Tapia ishte pezulluar më parë nga Këshilli i Gjyqësorit që prej 18 janarit, pas pranimit të një kërkese “habeas corpus” për lirimin e një të dyshuari të njohur si “Odin”, i lidhur me një organizatë kriminale të drejtuar nga Jezdimir Srdan.
Prokuroria pretendon se gjatë periudhës së pezullimit, Tapia i është afruar një gjyqtareje tjetër për të ndikuar në lirimin e një të pandehuri në një çështje për zhvatje dhe rrëmbim, një veprim që konsiderohet ndërhyrje e paligjshme në sistemin e drejtësisë. Nga ana e tij, gjyqtari mohon akuzat, duke deklaruar se nuk ka kërkuar lirimin e askujt, por vetëm ka sugjeruar shqyrtimin e një kërkese procedurale, ndërsa avokati i tij e ka cilësuar arrestimin arbitrar dhe pa prova konkrete.
Që prej 14 marsit, Tapia ndodhet në paraburgim në burgun e Litoralit në Guajakil, ku për shkak të rrezikut për sigurinë e tij, mbrojtja ka kërkuar masa të posaçme mbrojtjeje dhe që të mos mbahet me popullatën e përgjithshme. Ndërkohë, Këshilli i Gjyqësorit është përfshirë në çështje duke u deklaruar si “viktimë”, duke theksuar se veprime të tilla cenojnë integritetin dhe besueshmërinë e sistemit gjyqësor dhe nuk përjashton mundësinë e ngritjes së një padie për dëmshpërblim.
Discussion about this post