Qeveria e re e Maqedonisë së Veriut duket se nuk do të zgjidhet para janarit.
Procedura nis me zgjedhjet brenda partiake për kryetar të LSDM-së më 12 dhjetor dhe vijon më pas periudha për ankesa ndjekur procedurat për verifikimin e mandatit të tij brenda organeve të partisë.
Sipas ALSAT, zgjedhjes së kryetarit do t’i pasojë zgjedhja e nënkryetarëve dhe organeve të tjera të partisë. E gjithë procedura pritet të zgjasë deri në fund të muajit dhjetor. Nga LSDM-ja thonë se proceset do të diktojnë njëra tjetrën dhe për këtë nuk ka një periudhë të definuar në mënyrë precize.
“Fillimisht të zgjidhet kryetari dhe pastaj organet e partisë. Më pas organet e partisë do të sjellin vendime të këtilla. Shpresojmë në zgjidhje të shpejtë edhe të çështjeve të rëndësishme për fillimin e negociatave me BE-në. Të gjithë këto procese do të jenë në kuadër të këtyre proceseve të planifikuara dhe të thëna publikisht nga kryeministri dhe kryetari aktual Zoran Zaev”, ka thënë Zhaklina Llazarovska nga LSDM.
Në garë për të parin e LSDM-së janë Dimitar Kovaçevski, Frosina Remenski dhe Jovan Despotovski. Kovaçevski ka mbështetjen e Zaevit i cili duket se ka mbështetjen e plotë të tij teksa i drejtohet si mandatar i ardhshëm. Pasi të përfundojnë proceset brendapartiake, Zoran Zaevi njoftoi se do të deponojë në Kuvend dorëheqjen e tij nga pozita e kryeministrit. Pasi të konstatohet dorëheqja e Zaevit, konstatohet dorëheqja e të gjithë qeverisë.
Kreu i Kuvendit njofton presidentin se kryeministri është dorëhequr dhe presidenti, në afat prej dhjetë ditësh, duhet t’i japë mandatin partisë ose partive që kanë shumicën. Mandatari i ri duhet të propozojë kabinetin e ri qeveritar dhe programin e Qeverisë para deputetëve në Kuvend.
Jozyrtarisht, edhe partitë politike të shumicës parlamentare besojnë se gjysma e dytë e janarit pritet të jetë periudha e konkretizimit të gjithë këtyre procedurave.
Discussion about this post