Qendra e Shërbimeve Arsimore (QSHA) do të mbajë ditën e sotme një deklaratë për mediat në orën 11:00 për të dhënë detaje për provimin e Matematikës, i cili u diskutua shumë ditën e djeshme, pasi maturantët shpreheshin se ishte shumë i vështirë.
Ditën e sotme është paralajmëruar protestë nga ana e maturantëve në kundërshtim me tezën e provimit të fundit, ndërsa në vetëm 30 minuta, nisma ka marrë mbështetjen e 2 mijë maturantëve.
“Nesër në orën 11:00 në Qendrën e Shërbimeve Arsimore (QSHA) do të zhvillohet një deklaratë për media në lidhje me detaje nga testi i Matematikës, në kuadër të Maturës Shtetërore. Formati është i hapur edhe ndaj pyetjeve të kolegëve gazetarë. Mbrëmje të qetë!”, shkruhet në njoftim.
Rreth 34 mijë maturantë iu nënshtruan ditën e djeshme provimit të tretë të Maturës Shtetërore, atë të matematikës. Provimi nisi në orën 10:00 dhe përfundoi në 12:30. Në datën 15 qershor, të gjithë maturantët do t’i nënshtrohen provimit të fundit, atë të lëndës më zgjedhje.
