Komisioni Hetimor për hetimin dhe shkarkimin e Presidentit Ilir Meta pritet të mblidhet edhe sot në orën 12:00. Kjo është mbledhja e fundit ku Presidenti Ilir Meta ka mundësinë të paraqitet në seancë dëgjimore.
Kjo është java e fundit e aktivitetit të Komisionit Hetimor dhe pritet që të jetë e ngjeshur deri në hartimin e raportit përfundimtar që do të dorëzohet më 28 maj. Në mbledhjen e fundit, të zhvilluar më 21 maj, Komisioni i Posaçëm Hetimor diskutoi për të gjitha shkeljet që Presidenti ka bërë.
Eksperti i hetimit Erind Mërkuri tha se Kreu i Shtetit duhet të jetë mbi palët dhe sjellja e tij nuk duhet të jetë e anshme. Ekspertët juristë iu referuan praktikave të Komisionit të Venecias, apo Gjykatave Kushtetuese në vende të tjera, për të përcaktuar ‘kornizat’ se di duhet të jetë sjellja e kreut të shtetit veçanërisht në periudhën kur bëhet fjalë që populli do zgjedhë përfaqësuesit e tij në Kuvend.
Deputeti Edmond Stojku tha se kanë kërkuar dy herë informacion në Presidencë mirëpo nuk kanë marrë përgjigje. Shkelje të ligjit, Stojku quan dhe mosprezencën e Metës në Komision.
Alket Hyseni është kryetar i Komisionit Hetimor, ndërsa anëtarët janë: Myslym Murrizi, Klotilda Bushka, Vasilika Hysi, Elena Xhina, Spartak Braho, Halil Jakimi, Nikolin Staka, Arlind Çarçani, Ermonela Felaj, Xhemal Qefalia dhe Eugen Bojaxhi.
