Një tentativë grabitje është regjistruar mbrëmjen e shkuar në Sukth të Durrësit, ku 3 persona janë arrestuar nga policia. Ngjarja ka ndodhur rreth orës 20:00, ku 5 persona të armatosur kanë hyrë në banesën e personit me iniciale B.M, dhe e kanë kërcënuar atë me armë. Në momentet kur ky i fundit ka pikasur grupin e grabitësve, menjëherë ka lajmëruar policinë e cila ka ndërhyrë në kohë. Gjatë aksionit të policisë për kapjen e këtyre personave, 2 prej tyre mundën të largohen, të cilët janë vëlla e motër. 3 anëtarë të grupit janë arrestuar, konkretisht Albion Kllari, Domeniko Ceni dhe Leonard Preza. Sipas policisë, mundën të largohen për shkak të errësirës 2 anëtarët e tjerë të grupit, P.P 27 vjeç dhe A.P 20 vjeçe të cilët janë motër e vëlla, por njëkohësisht dhe bashkëpunëtorë në grabitjet e kryera. Fatmirësisht pronari i banesës nuk është lënduar nga kjo tentativë grabitje, teksa është marrë në pyetje nga policia për më tepër detaje.
Burime nga uniformat blu bëjnë me dije se, po ky grup ka kryer një sërë vjedhjesh në Durrës.
