Moti i keq në vend, del nga shtrati lumi Devoll

Moti i keq ka pushtuar sot gjithë vendin.

Reshjet e dendura të shiut që kanë rënë gjatë ditëve të fundit kanë rritur edhe nivelin e ujit në lumin Devoll.

Për pasojë, në disa toka në dalje të qytetit të Gramshit lumi ka dalë nga shtrati duke bërë që të përmbyte disa toka bujqësore. Ndërkohë, hidrocentrali i Banjës po shkon drejt kuotës maksimale, por ende nuk ka vend për shkarkime.

Por rajoni i Lezhës është më problematik aktualisht si pasojë e motit të keq. Këtë e ka konfirmuar edhe nënkryetari i Bashkisë së Lezhës, Ermal Paci, gjatë një interviste televizive.  Sipas tij, het situata jo e mirë paraqitet në  ish-kënetën e Torovicës, ku raportohet të jenë përmbytur 20 hektarë tokë. “Deri tani raportohen 45 milimetra shi, gjatë mesditës nuk kanë qenë reshje të shumta shiu. Situata, përveç në ish-kënetën e Torovocës, ku rreth 20 ha tokë janë të përmbytura, nuk kemi probleme të tjera, situata është nën kontroll. Bashkia ka ngritur grupet e punës, të cilat janë në terren gjatë gjithë kohës”.

Sipas nënkryetarit Paci, nuk raportohet probleme të zgjatura me energjinë elektrike dhe se hidrovoret janë në gjendje normale pune.