Eksperti i ekonomisë, Enriko Ceko, ka komentuar sot gjatë një interviste televizive buxhetin 2022. Sipas tij, ky buxhet është plot me boshllëqe dhe abuzime, duke kujtuar se mbledhja për të u bë në mesnatë. Ceko tha se ka diçka që nuk shkon dhe kjo duket hapur prandaj qeveria këmbëngulte ta kalonte sa më parë atë. “Kthehesh dhe rishikon buxhetin 3 herë tregon se janë disa gjëra që nuk shkojnë mirë. Mbledhja për të kaluar buxhetin bëhet në orën 24:00. Pse bëhet kjo a thua se nuk ka ditë”, tha ai.
Ndër të tjera, Ceko shprehet se buxhetit i mungon 16% të parave që duhet të kishte. Ai shtoi se qeveria kërkon ta mbulojë 16% e munguar duke marrë borxhe dhe kërkon t’u hedh sy qytetarëve duke iu thënë se eurobondi do shkojë për paga dhe investime. “Kemi një buxhet të cilit i mungojnë 16 % të parave. Është njësoj si të bësh dasmë me 100 të ftuar dhe të kesh pjata për 84 persona. Kemi shprehjen shtri këmbët sa ke jorganin. Buxhetit i mungojnë 16% të parave. Dhe këtë mungesë prej 16%, qeveria mendon ta plotësoje duke dalë në tregun ndërkombëtar për të marrë para”, shkruan ai.
Sipas tij, qeveria gënjen edhe për borxhin, pasi në të vërtetë është shumë herë më i lartë nga sa raportohet. Ndër të tjera, ai theksoi se edhe shpërndarja e borxhit që merret nuk bëhet në mënyrën e duhur, por me plan abuziv dhe tendencioz. “Thuhet që borxhi është 80% por është 90%. Qeveria po e mban euron në mënyrë të sforcuar me 120 lekë, se po të ishte 144 lekë sa para 4-5 vitesh, borxhi publik do ishte shumë herë më e madhe. Edhe pse dalim në tregun ndërkombëtar për të marrë para, vitin tjetër kemi 450 milionë euro të interesave të mëparshme. 16% që mungon në buxhet është vështirë për t’u mbushur. Pretendohet edhe sikur t’i kishim 16%, do të shpërndahej sipas sektorëve. Ne kemi një problematike të madhe te kjo shpërndarje”, tha ai, duke shtuar faktin që qeveria asnjëherë nuk jep mbështetje direkte për bizneset.
Discussion about this post