Ndryshimet në qeveri, reagon Lulzim Basha

Lulzim Basha ka reaguar, pasi Edi Rama ka bërë publike ndryshimet në qeveri.

Basha shprehet se qeveria nuk i shpëton drejtësisë me tubime politike e partiake. Sipas tij, drejtësia duhet të vazhdojë punën e saj, duke ndëshkuar çdo aferë shtetërore.

“Qeveria e damkosur nga SPAK për aferën e inceneratorëve nuk i shpëton dot drejtësisë me tubime partiake ku bashkë i bën vetëm frika e ndëshkimit prej zullumeve që kanë bërë në kurriz të shqiptarëve.

Drejtësia duhet të vijojë punën e saj për hetimin e aferës së inceneratorëve, sterilizimit dhe çdo denoncimi për korrupsionin shtetëror në çdo hallkë. E pandikuar nga presioni qeveritar apo politik i kujtdo qoftë. Kjo është mënyra e vetme për të vënë para drejtësisë abuzuesit me pasuritë e shqiptarëve dhe bashkëpunëtorëve të tyre që e kanë lënë Shqipërinë peng të Edi Ramës”, shprehet Basha.