Futbolli po përjeton një trend të ri, ku yjet e mëdhenj nuk po mjaftohen vetëm me sukseset në fushë.
Gjithnjë e më shumë futbollistë po investojnë në klube dhe po bëhen aksionarë apo bashkëpronarë.
Një nga shembujt më të mëdhenj është Lionel Messi, i cili ka marrë 100 për qind të aksioneve të UE Cornella.
Klubi katalanas garon në kategorinë e pestë spanjolle dhe synon zhvillimin e talenteve të rinj.
Edhe Cristiano Ronaldo ka hyrë në botën e pronësisë, duke blerë 25 për qind të aksioneve të Almerias.
Portugezi ka deklaruar se synon që në të ardhmen të ketë disa klube në pronësi.
Ndërkohë, Vinicius Junior është pjesë e një grupi investitorësh që zotëron shumicën e aksioneve të Alvercas në Portugali.
Në këtë projekt janë përfshirë edhe emra të tjerë të njohur, ndërsa objektivi është zhvillimi i klubit dhe talenteve të rinj.
Kylian Mbappe bleu shumicën e aksioneve të SM Caen në vitin 2024, në një investim prej rreth 15 milionë eurosh.
Megjithatë, aventura e francezit nuk ka nisur mirë, pasi Caen ra nga Ligue 2 në kategorinë e tretë.
Edhe Luka Modric është bërë bashkëpronar minoritar i Swansea City, me kroatin që synon të mësojë nga afër menaxhimin e klubit.
Ndërkohë, Thibaut Courtois është ndër investitorët më aktivë, pasi gjatë vitit të fundit është bërë pjesë e tre projekteve të ndryshme.
Belgu ka investuar te Le Mans, Extremadura dhe së fundmi te Genk, klubi ku nisi karrierën profesionale.
Të gjitha këto raste tregojnë se futbollistët po ndërtojnë një rol të ri në industri, duke kombinuar eksperiencën sportive me investimet dhe biznesin.
Nga akademitë dhe zbulimi i talenteve, te marketingu dhe zhvillimi i lojtarëve, yjet po synojnë të ndërtojnë perandori futbolli edhe pas përfundimit të karrierës.
Discussion about this post