Kandidati i Vetvendosjes për asamblist në Gjilan, është futur në “listën e zezë” të Shteteve të Bashkuara të Amerikës. Bëhet fjalë për Tahir Dalipin, i cili është anëtarësuar në VV nga janari i këtij viti, është pjesë e “listës së zezë” të ShBA-së. Amerika e kishte cilësuar Dalipin, si një prej njerëzve që kishte kërcënuar përpjekjet ndërkombëtare për stabilizim në Ballkanin Perëndimor.
Në një prononcim për gazetën Express, Dalipi ka thënë se s’ka marrë asnjëherë ndonjë shpjegim të saktë se pse është pjesë e kësaj liste, por dyshon se lidhet me aktivitetin e tij si anëtar politik i Ushtrisë Çlirimtare për Presheve, Medvegjë e Bujanovc (UÇPMB).
“Në fakt arsyeja ka qenë pamundësia e ime në atë kohë që të pajtohem me zgjidhjen që na është ofruar…dhe kjo është marrë si mospajtim apo edhe kundërshtim, por në fund kjo është diplomacia e shteteve të mëdha, nuk pyesin shumë për individët. Nuk janë verifiku gjanat sa duhet dhe ka ndodh çka ka ndodh. Aktulisht nuk është aktive më ajo listë, realisht s’ka asnjë efekt” – ka thënë ai.
Ndërsa lajmin se është pjesë e kësaj liste, Dalipi thotë se e ka marrë vesh nga mediat, derisa shton se ka gjasa që personi në listë mund të jetë dikush tjetër, meqenëse viti i lindjes nuk është i njëjtë.
“E kam pa në media, sepse kurrë nuk më është dhënë ndonjë. Ka aty edhe emra bukur të njohur që tash janë në skenën politike. Është shumë e mundur që të jetë ndonjë person tjetër, e të jetë i ngatërruar emri. Mund të jetë personi që e ka vitin e lindjes në atë listë. Seriozitetin e asaj liste e shpjegon edhe vetë ky fakt që nuk janë verifikuar gjërat, sepse veprimtaria ime s’ka qenë ushtarake, por politike dhe në koordinim me aksionet e asaj kohe që ta përmirësojnë gjendjen në Luginën e Preshevës”- është shprehur.
Ai gjithashtu ka thënë se nëse do të shkonte në SHBA, s’beson se do të kishte probleme.
“Kurrë s’kam mund të kem aq para sa me shku atje. Unë nuk kam çka kërkoj atje. Për të shku për punë, e dini se është e pamundur. Jam i bindur se po t’i kisha mundësitë dhe po të kisha nevojë, nuk e besoj se do të më shfaqej ndonjë vështirësi e madhe për të shku” – ka thënë Dalipi.
