“Nuk ka dy PD, por vetëm një”, Vehap Kola: Po bëhet një luftë për interesat personale

Anëtari i Këshillit Kombëtar të Partisë Demokratike, Vehap Kola, gjatë fjalës së tij në Kuvendin e mbajtur këtë të shtunë, ka treguar se PD është vetëm një dhe e pa përçarë. Ai tha se nuk ka dy Parti Demokratike, por vetëm një që lufton për konservatorizmin në Shqipëri.

“Nuk dua të kritikojë PD, por dua t’ju paralajmëroj për një gjë të dytë që janë analistët e oligarkisë që janë turrur nëpër media duke sulmuar PD, duke quajtur një parti pro-amerikane dhe një tjetër anti-amerikane. Nuk ka dy parti, ka vetëm një dhe kjo është Partia Demokratike e Shqipërisë. Detyrimi është që ta dëshmojmë këtë.

Nuk do të doja të vazhdojmë të bëjmë propagandë, do të doja që t’u themi njerëzve të vërtetën siç është. Në kuadër të kësaj do të doja që të risjellja në Kuvend që ka gjëra që nuk shkojnë në PD, por edhe para 2013, para 25 prillit, edhe dua të fokusohem në një prej tyre. PD është shndërruar në një imitim të partisë së punës. Duke qenë e tillë e humbi energjinë për të shërbyer si një e kundërt morale e ideologjike. Ne kishim qeveri të korruptuara. Kishim ilaçe false më pas e sa bëhen sot” – u shpreh Kola.

Ai më tej tha se edhe PD është fajtore e vendosjes së oligarkëve dhe se duhet folur shqiptarëve me gjuhë të thjeshtë e pa slogane, e nënvizoi se vetëm me këtë formë ndoshta do të dëgjohen.

“Shkollat tona ishin pa ngrohje edhe atëherë, jo vetëm sot. Kështu që edhe në kohën tonë kishim një Shqipëri të oligarkëve, të cilët i linin shqiptarëve vetëm kotheren për të mbijetuar. Edhe ne kemi vendosur tullat tona në oligarkinë. Duhet t’ia themi vetes se kundërshtari ynë kryesorë nuk është adresuar sinqerisht nga ne. Nuk ka njerëz të lirë e të varfër. Shtresa e mesme është në gjendje të durojë disa muaj në protesta të drejta. Nëse i themi këto gjëra shqiptarëve besoj se do të na besojnë më shumë. PD nuk zëvendëson asnjë institucion shtetëror, por duhet të bëjë punën që bëjnë partitë konservatore. Pa u çrrënjosur këto pengesa, do i flasim shqiptarëve në mënyrë të pa sinqertë e do të na bëjnë sikur na besojnë” – tha Kola.