Hysen Kadiu, kreu i degës së Partisë Demokratike Kavajë, ditën e sotme përmes një postimi në rrjetet e tij sociale ka shkruar se ky qytet po zhbëhet nga Rilindja, duke ia larguar të gjitha institucionet.
Kadiu përmes këtij postimi akuzon kryebashkiakun dhe deputetin e zonës se kanë kaluar në heshtje përçmimin që po i bëhet qytetit.
“Periodikisht, qytetit tonë kanë filluar t’i presin krahët duke e zhveshur nga institucionet kryesore, të cilat i japin peshë një qyteti! E para që e dërrmoi atë ishte Reforma territoriale, që la jashtë Bashkisë zona dhe pika strategjike të saj, të cilat historikisht kanë qenë pjesë e Kavajës. Vazhduan më vonë duke zhbërë dalëngadalë Spitalin e qytetit dhe duke e kthyer nga një Spital Rajonal të pajisur me të gjitha kushtet bashkëkohore, në një Qendër shëndetësore, ku edhe për një operacion të thjeshtë duhet të shkosh me urgjencë në spitalin e Durrësit.”
Gjithashtu, Kadiu e vazhdon shkrimin e tij se vendimi i fundit për eliminimin e qendrës së shërbimeve “ADISA” dhe për largimin e Drejtorisë së Kadastrës jashtë qytetit janë pjesë e një sërë aktesh politike, të cilat po e zhveshin Kavajën nga institucionet!
“Më pas radhën do ta kishin Gjykata e rrethit dhe Drejtoria Arsimore. Të dyja këto institucione të rëndësishme po i largojnë nga qyteti ynë për t’u vendosur në Durrës.
Të parën me anë të Reformës gjyqësore, e cila pritet të vihet në funksion së shpejti, si pasojë e së cilës qyteti ynë do të mbesë pa gjykatë. Ndërkohë Drejtorinë arsimore e kanë zëvendësuar me një zyrë vendore, të varur nga Drejtoria në Durrës, e cila nuk ka asnjë lloj kompetence në vendimmarrje. Këto janë manovra burokratike dhe politike, të cilat qëllim të tyre kanë vetëm bërjen më të vështirë të jetesës së qytetarëve të Kavajës”.
Discussion about this post