Disa banorë në Durrës kanë dalë sot në protestë pasi ndihen të rrezikuar nga punimet pa kriter që bëhen pranë pallatit ku ata banojnë, i cili ka mbetur i dëmtuar nga tërmeti i viti 2019. Bëhet fjalë për lagjen 13 në Durrës, ku u shemben dhe mbetën të dëmtuar me qindra banesa pas tërmetit të fortë që goditi vendin tonë. Por bashkia në vend që të ndihmojë banorët të rikonstruktojnë pallatin e tyre i cili është klasifikuar në nivelin DS3, ka dhënë lejë për ndërtime të tjera aty pranë. Por sipas banorëve, këto ndërtime rrisin rrezikun që nga momenti në moment pallati ku ata banojnë të shembet.
Në një prononcim për mediet ata tregojë se kanë kërkuar ndërhyrjen e institucioneve lokale dhe organit të akuzës për ndërprerjen e punimeve, por askush nuk ka reaguar ndaj sot kanë protestuar para prokurorisë së Durrësit.
“Ne jemi dëmtuar në nivelin DS3. Para 6-7 ditësh kanë ardhur për të ndërtuar një pallat tjetër, ngjitur me ne. Kemi bërë ankesë në bashki, prokurori e gjykatë dhe askush s’na ka dhënë përgjigje. Ne jemi të dëmtuar nga tërmeti, me kolonë të thyer, e kolona të tjera dhe shkallët të dëmtuara nga tërmeti që do riparohen. Ne po presim që të vijnë të na riparojnë, ai po na gropos fare”, thotë një banor.
Ata tregojnë se leja për ndërtesën peskatëshe që po ngrihet pranë pallatit të tyre është dhënë disa vite më parë, po së fundmi firma ndërtuese ka nisur punimet që kanë vënë në rrezik për jetën familjet që jetojnë në këtë pallat.
Të detyruar banorët kanë braktisur pallatin, pasi nuk ndjehen të sigurtë brenda tij, ndërsa kërkojnë ndërhyrjen e prokurorisë dhe gjykatës për të pezulluar punimet dhe hetuar mbi këtë rast, si dhe për t’u siguruar të drejtën e jetës dhe strehimit.
“Kishte marrë lejen. Ne reaguam dhe erdhi kryetari i bashkisë, Vangjush Dako, në atë kohë dhe i pezulloi punimet me një fjalë goje. Firma u largua. Leja ishte dhënë pa u parë konkretisht në terren, toka. Ne jemi më të cenuarit”.
Në këto kushte ata i bëjnë thirrje publike bashkisë dhe Prokurorisë së Durrësit që të lëshojnë një vendim për ndërprerjen e punimeve të ndërtesës pesëkatëshe dhe të përcaktohet një fond për rikonstruktimin e pallatit të tyre.
Ky nuk është rasti i vetëm ku pas dy vitesh nga tërmeti qytetarët e mbetur të pastrehë ankohen se jetojnë në çadra dhe nuk kanë marrë asnjë bonus apo lajm nga qeveria se kur do të ndërtohen banesat e tyre.
