Pandemia e koronavirusit preku ndjeshëm biznesin e hotelerisë në Gjirokastër, një qytet turistik që mbrohet nga UNESCO. Por një sipërmarrës që vuri në shërbim hotelin gjatë periudhës së bllokimit prej pandemisë për një trupë policore të rojës europiane Frontex përfitoi nga të ardhurat dhe ndërtoi një hotel të ri. Shërbimi i Hotelit të ri është ngritur në një shtëpi 200 vjeçare që ruan mjaft prej elementëve historikë të kohës dhe është tërheqëse për turistët vendas dhe të huaj.
Një vit më parë Qendra Historike e Gjirokastrës që mbrohet nga UNESCO u zbraz nga turistët vendas dhe të huaj prej situatës së pandemisë së koronavirusit. Bizneset e vogla turistike u mbyllën dhe shumica e hoteleve dhe bujtinave të vogla në qytet nuk punonin, pasi turistët i anulluan rezervimet.
Por hotel “Kodra” ishte ndër të vetmit hotele që punoi pasi një ekip i oficerëve të policisë së rojës europianë të kufijve, FRONTEX kryente shërbimin në kufirin shqiptaro – grek në Kakavijë dhe qëndronte në Gjirokastër.
Pronari i dy hoteleve tashmë, Hysen Kodra thotë se e shfrytëzoi këtë mundësi me të ardhurat që u krijuan dhe realizoi kthimin eshtëpisë 200 vjeçare të familjes në një hotel të ri.
“Në kohën e pandemisë që të gjitha bizneset u mbyllën unë isha i vetmi hotel i hapur sepse kisha disa oficerë policie të huaj çekë dhe me të ardhurat e tyre restaurova shtëpinë dhe e ktheva në bujtinë”, thotë ai.
Hyseni thotë se i vendosi emrin hotelit të ri “Praga” pikërisht prej oficerëve çekë që qëndruan në atë periudhë dhe i mundësuan kthimin e shtëpissë së vjetër të familjes në një hotel që ishte një ëndërr e tij. Hyseni thotë se gjatë pandemisë krahas fjetjes ofronte edhe ushqim për 10 oficerët e FRONTEX pasi në atë periudhë ishte i vështirë sigurimi i shërbimeve nga bllokimi lëvizjes. Ai përfitoi edhe një leje të qarkullonte gjatë asaj periudhe pasi duhet të siguronte ushqimet dhe furnizimin e hotelit për këtë trupë të vogël policore.
Prindërit, thotë Hyseni ishin të dy rrobaqepës dhe me mundim e mbajtën shtëpinë 200 vjeçare e cila 100 vjet më parë kishte njohur një restaurim ku stili ndërtimor i periudhës otomane ishte ndikuar edhe nga stili francez.
“Është shtëpi e ndërtuar në 1826 .Ka qenë shtëpi e Abedin Hoxhës , e periudhës otomane me piktura murale dhe me shumë elementë. Para 100 vjetësh u restaurua me stil francez. Quhet shtëpi otomane marsejiane. Dhoma ku po flasim është 80% origjinale dhe janë ruajtur elementët e vjetër”, thotë ai.
Hyseni thotë se krahas ruajtjes së elementëve ndërtimorë të shtëpisë ka ruajtur edhe objekte dhe libra të vjetër që vijnë që nga periudha otomane dhe më vonë.
Gjirokastra ndonëse një qytet i vogël me ndërtime karakteristike të periduhës otomane falë shkëmbimeve tregëtare dhe kulturore në periudhën e rreth 100 viteve më parë ka njohur edhe ndikime si nga stili francez dhe ai italian në disa prej ndërtimeve.
Arnoldo Mazeti thotë se ka ardhur nga Tirana dhe e ka gjetur hotelin në internet. Ai thotë se është tejet i kënaqur pasi ndryshe nga shumë të rinj që pëlqejnë bregdetin kërkon t`i kalojë pushimet në vende të trashëgimisë kulturore.
“Tek hoteli më pëlqeu bujaria. Thonë se gjirokastritët janë pak kopracë por bujaria dhe mikpritja egzistojnë në Gjirokastër. Hoteli ishte më shumë se katër yje dhe pjesa e pishinës ishte një diferencë shume e veçantë. Bashkohet arkitektuar e vjetër me atë të re dhe bëhet një bashkëpunim shumë i veçantë. “
Pandemia e koronavirusit solli frenim të biznesit por Hyseni thotë se ka ambicie për ta zgjeruar aktivitetin e tij.
Gjirokastra, është një qytet i nxehtë në verë por mjediset e larta të shtëpive historike i bëjnë hotelet dhe bujtinat të freskëta dhe tërheqëse për vizitorët.
Hyseni thotë se është optimist se situata e pandemisë po kalon dalëngadalë dhe ai mezi pret që krahas individëve nga shumë vende që po vijnë në dy hotelet e tije dhe grupet turistike t`i rikthejnë shumë shpejt rezervimet.
Biznesi i hotelerisë ishte nga më të goditurit gjatë pandemisë së koronavirusit në Shqipëri. Pasojat po ndihen edhe tani pasi shumë biznese kanë probleme me sigurimin e pesonelit që ishte i trainuar por u shkëput prej mbyllje për një periudhë të gjatë të aktivitetit./VOA
