Deputeti i Partisë Demokratike, Bledjon Nallbati ka reaguar pas dëshmisë së Deizi Arapit për një konflikt të pretenduar me deputetin duke e fajësuar për djegien e makinës së saj para derës së shtëpisë.
27-vjeçarja ka pretenduar se është konfliktuar me ish-kryebashkiakun Bledjon Nallbati, i cili aktualisht është deputet i Partisë Demokratike. Nallbati, në një prononcim nga Gjermania i mohon akuzat dhe deklaron se do të bëjë kallëzim për shpifje ndaj 27-vjeçares.
“Jam i habitur nga këto akuza. Unë kam pasur vetëm një konflikt verbal kur isha kryebashkiak, por asgjë më tepër. Besoj se është nxitur nga dikush tjetër për të bërë këto akuza. Sa i përket punëtorit tim nuk mbaj përgjegjësi për çdo punëtor që kam, me kë zihen dhe çfarë bëjnë. Sapo të kthehem nga Gjermani do të bëj një kallëzim për shpifje”, deklaroi Nallbati.
Deizi Arapi deklaroi më herët se konflikti me Nallbatin nisi katër vite më parë, pasi nëna e saj u pushua nga puna padrejtësisht. Që nga ajo kohë, 27-vjeçarja thotë se kanë nisur konfliktet me Nallbatin. Po ashtu, ajo bën të ditur se ditën e djeshme është ndjekur nga një person me të cilin shkëmbeu disa fjalë, i cili beson se është punonjës i karburantit në pronësi të Nallbatit.
Discussion about this post