Në seancën e sotme parlamentare në Kosovë ka patur debate midis kryeministrit, Albin Kurti dhe deputetit të AAK-së, Ramush Haradinaj.
Kurti gjatë fjalës së tij ju përgjigj akuzave të Haradinajt se operacionet policore në veri ishin bërë me qëllim për ta dorëzuar atë pjesë. Ai u shpreh se në veri të Ibrit ka më shumë rend e ligj sot se sa ndonjëherë tjetër që nga shpallja e pavarësisë. Kurti tha se ajo pjesë ka qenë e rrezikuar kur Haradinaj e priste në zyrë Milan Radojiçiçin.
“Asnjë barrikada nuk ka në veri. Veriu ka qenë i rrezikuar atëherë kur deputeti Haradinaj e priste në zyrë kriminelin Milan Radojeçiq. Nuk e rrezikon veriun Policia, por kriminelët dhe bashkëpunimi i tyre me politikanët”, ka thënë Kurti
Ai më tej tha se fjalët e Haradinajt janë sulm ndaj moralit të policisë.
“Kot e keni që po sulmoni Haradinaj. Morali i policit është shumë i lartë dhe i paprekshëm. Kurrë morali i tyre s’ka qenë më i fuqishëm”, u shpreh Kurti.
Nuk ka munguar dhe replika e Haradinajt i cili u shpreh se frikën nuk e ka te policia por te vetë Kurti.
“Unë i besoj Policisë së Kosovës. Frikën e kam te ti kryeministër, që ti qëllimshëm i ke marrë dy veprime me dorëzua veriun. Unë besoj që skenari yt me marr dy veprime mu forcu kriminelët i ke ba qëllimshëm”, tha Haradinaj.
Ndërkohë Kurti ju kundërpërgjigj duke thënë se veriu i Kosovës nuk dorëzohet.
“Kriminelët në veri dhe strukturat ilegale kurrë nuk kanë qenë më të frikësuara se tash. Nuk keni nevojë të më frikësoheni mua, nuk dorëzohet veriu. Por mos ngjallni dilema te policia kur shkojnë herën e ardhshme në veri se kushedi për çfarë ju ka qu Albini, kjo është e dëmshme dhe këtë nuk ta ka borxh askush”, tha Kurti.
