Partia e Lirisë doli sot në mbështetje të kryetarit të Partisë Demokratike Sali Berisha në lidhje me procesin gjyqësor ndaj tij në Gjykatën kundër Korrupsionit dhe Krimit të Organizuar, për dosjen “Partizani”.
Në një deklaratë për mediet, Sekretari i Përgjithshëm i Partisë së Lirisë, njëkohësisht deputeti i zgjedhur në 11 maj Tedi Blushi, theksoi se “Partia e Lirisë dënon me forcë procesin gjyqësor politik në kuadër të së ashtuquajturës çështje “Partizani”, një farsë e turpshme dhe shembull tipik i kapjes për fyti të drejtësisë nga regjimi autokratik”.
Sipas Blushit, “ky proces është jo vetëm një sulm i pastër politik ndaj liderit historik të Partisë Demokratike, Prof.Dr. Sali Berisha, por edhe një dëshmi e qartë se drejtësia në Shqipëri është kthyer në një armë të pushtetit për të asgjësuar opozitën dhe pluralizmin politik, si dhe për të frikësuar këdo që ngre zërin kundër regjimit”.
“Partia e Lirisë është e vendosur të qëndrojë fuqishëm përballë çdo përpjekjeje për të kriminalizuar opozitën dhe për të shtypur zërin e së vërtetës”, u shpreh Blushi.
Blushi tha se “Partia e Lirisë dhe qytetarët shqiptarë nuk mund të pranojnë kurrë një drejtësi të përdorur si vegël qorre e narkoshtetit”.
Discussion about this post