Policia e Tiranës ka reaguar zyrtarisht pas publikimit në rrjetet sociale të një videoje ku shfaqet një konflikt fizik mes disa personave dhe ku pretendohet se është dhunuar ish-banori i “Big Brother VIP Kosova”, Eduard Kuçi.
Pas verifikimeve të kryera, Policia ka bërë të ditur se ngjarja e filmuar ka ndodhur në afërsi të mbikalimit të Rinasit.
Në vijim të hetimeve, shërbimet e Komisariatit të Policisë Nr. 6 kanë ndaluar këngëtarin dhe ish-banorin e “Big Brother VIP Albania”, Jozefin Marku, 30 vjeç, i njohur ndryshe si Joz Marku.
Sipas Policisë, ndaj tij rëndojnë pesë akuza: “Heqja e paligjshme e lirisë”, “Plagosja e lehtë me dashje”, “Kanosja”, “Mbajtja pa të drejtë e uniformës” dhe “Ndërhyrja e padrejtë në jetën private”.
Në kuadër të të njëjtit hetim është ndaluar edhe Kristian Nikolli, 31 vjeç, i cili dyshohet se ka qenë drejtuesi i automjetit tip “Land Rover”.
Nikolli dyshohet për veprat penale “Përkrahja e autorit të krimit”, “Mbajtja pa leje dhe prodhimi i armëve, bombave ose minave dhe i municionit”, “Heqja e paligjshme e lirisë”, “Plagosja e lehtë me dashje”, “Kanosja”, “Mbajtja pa të drejtë e uniformës” dhe “Ndërhyrja në jetën private”.
Ndërkohë, në lidhje me ngjarjen janë shpallur në kërkim edhe dy persona të tjerë, A. H., 48 vjeç, dhe K. V., 27 vjeç.
Gjatë kontrollit të ushtruar në banesën e Kristian Nikollit, Policia ka gjetur dhe sekuestruar një sasi municioni. Gjithashtu është sekuestruar automjeti tip “Land Rover”, i cili dyshohet se është përdorur në ngjarje.
Sipas Policisë, të ndaluarit, në bashkëpunim me persona të tjerë që ende nuk janë identifikuar, dyshohet se kanë dhunuar Eduard Kuçin, 26 vjeç, me pretendimin se ai kishte fyer njërin prej tyre.
Njoftimi
Drejtoria Vendore e Policisë Tiranë. Në lidhje me një video të publikuar në rrjete sociale, në të cilën shfaqet një konflikt ndërmjet disa shtetasve, sqarojmë se: Nga verifikimet e kryera rezultoi se pamjet ishin filmuar në afërsi të mbikalimit të Rinasit.
Për dokumentimin e plotë të rrethanave të rastit dhe identifikimin e personave të përfshirë, shërbimet e Drejtorisë Vendore të Policisë Tiranë, kanë kryer veprime hetimore në bashkëpunim me Drejtorinë Vendore të Policisë Lezhë.
Si rezultat i veprimeve të kryera nga shërbimet e Komisariatit të Policisë Nr. 6, u ndaluan shtetasit Jozefin Marku, 30 vjeç, për veprat penale “Heqja e paligjshme e lirisë”, “Plagosja e lehtë me dashje”, “Kanosja”, “Mbajtja pa të drejtë e uniformës” dhe “Ndërhyrja e padrejtë në jetën private”, si dhe K. N., 31 vjeç, i cili dyshohet se ka qenë drejtues i automjetit tip “Land Rover”, për veprat penale “Përkrahja e autorit të krimit”, “Mbajtja pa leje dhe prodhimi i armëve, bombave ose minave dhe i municionit”, “Heqja e paligjshme e lirisë”, “Plagosja e lehtë me dashje”, “Kanosja”, “Mbajtja pa të drejtë e uniformës” dhe “Ndërhyrja në jetën private”.
Ndërkohë, u shpallën në kërkim shtetasit A. H., 48 vjeç dhe K. V., 27 vjeç.
Gjatë kontrollit të banesës së shtetasit K. N., u gjetën dhe u sekuestruan një sasi municioni, si dhe automjeti tip “Land Rover”, i dyshuar se është përdorur në ngjarje.
Këta shtetas dyshohet se, në bashkëpunim edhe me shtetas të tjerë, ende të paidentifikuar, kanë dhunuar shtetasin Eduard Kuçi, 26 vjeç, me pretendimin se ky i fundit kishte fyer një prej tyre. Punohet për kapjen e shtetasve të shpallur në kërkim, identifikimin e personave të tjerë të përfshirë në këtë ngjarje dhe nxjerrjen e tyre përpara përgjegjësisë penale. Materialet procedurale iu referuan Prokurorisë, për veprime të mëtejshme.
Discussion about this post