Gjatë kontrolleve të ushtruara në të gjithë vendin në fundjavë policia ka arrestuar 17 drejtues mjetesh dhe ka vendosur 2,111 masa administrative për shkelje të rregullave të qarkullimit rrugor.
Po ashtu, Policia Rrugore e Tiranës ka ndaluar të shtunën drejtuesin e një autobusi që po kryente manova të rrezikshme në rrugën e Rinasit. Mësohet drejtuesi i autobusit me 50 vende, po kryente manovra dhe parakalime të gabuara.
Pas alkooltestit rezultoi se drejtuesi i autobusit, me iniciale A. S., i cili po transportonte pasagjerë nga Tirana në Valbonë, drejtonte autobusin në gjendje të dehur, në masën 0.64 ml/l. 50-vjeçari u arrestua për veprën penale “Drejtimi i automjetit në mënyrë të parregullt”.
Sa i përket arrestimeve të tjera, nga kontrollet duke përdorur mjetet e pauniformuara, kamera të vendosura në automjete, radarë, alkooltestues dhe dronë, në të gjitha akset rrugore kombëtare dhe rrugë të tjera të evidentuara si “njolla të zeza”, policia vuri në pranga 17 drejtues mjetesh, nga të cilët 8 për drejtim mjeti në gjendje të dehur dhe 9 për drejtim mjeti pa leje drejtimi.
Gjithashtu janë pezulluar 97 leje drejtimi, nga të cilat 76 për shpejtësi mbi normat e lejuara dhe 21 për drejtim mjeti nën efektin e alkoolit.
Po ashtu, janë vendosur 2,111 masa administrative për shkelje që janë burim për përfshirje në ngjarje rrugore, si parakalime të gabuara, manovra të rrezikshme në rrugë, shpejtësi tej normave të lejuara, shkelje semafori, drejtim mjeti nën ndikimin e alkoolit etj.
