SPAK i ka dorëzuar sot Policisë së Shtetit urdhër-arrestin për ish-zv.Kryeministrin Arben Ahmetaj. Ndaj deputetit socialist GJKKO kishte vendosur masën e sigurisë me burg, në mungesë, ndërsa ka miratuar gjithashtu edhe kontrollin në banesat e ish-zv.Kryeministrit.
Tashmë i takon Policisë së Shtetit që të nisë kërkimet dhe të lokalizojë vendndodhjen e Arben Ahmetajt. Fillimisht Policia e Shtetit do të verifikojë nëse deputeti i PS-së ndodhet ose jo në Shqipëri, dhe më pas do të bëhet shpallja në kërkim ndërkombëtar, nëse rezulton se ai nuk është brenda vendit.
Por sa zgjat procedura?
Nëse i referohemi rastit të ish-Kryeprokurorit Adriatik Llalla, Policia e Shtetit konsumoi dy javë për të vërtetuar se Llalla nuk ndodhej në Shqipëri dhe më pas u bë edhe shpallja në kërkim ndërkombëtar e tij.
Ndoshta e njëjta procedurë do të ndiqet edhe në rastin e Ahmetajt dhe me shumë gjasë emri i tij do të shpallet në kërkim ndërkombëtar në fund të muajit korrik ose fillimin e muajit gusht.
Avokatët e Arben Ahmetajt kanë pohuar se ish-zv.Kryeministri ndodhet në Londër, pranë familjes së tij.
Nuk dihet nëse kjo deklaratë është e vërtetë ose jo, por pavarësisht kësaj, Policia e Shtetit, nëse provon se deputeti nuk ndodhet në Shqipëri, duhet ta shpallë në kërkim ndërkombëtar dhe më pas do të nisë puna për lokalizimin e vendndodhjes së tij përmes zyrës së Interpool.
Discussion about this post