“Rama jepe dorëheqjen”- Qytetarët marshojnë rrugëve të Tiranës: Rama në burg, Berisha në burg! Ndryshim sistemi, ju erdhi fundi

Dita e 66-të e protestës para Kryeministrisë u mbyll me thirrjet për dorëheqje të qeverisë dhe ndryshim të klasës politike.

Pas përfundimit të fjalimeve në bulevard, protestuesit kanë nisur marshimin e tyre në Bulevardin “Dëshmorët e Kombit”.

“Ju erdhi fundi”, “Rama jepe dorëheqjen”, “Revolucion”, “Shqipëria e shqiptarëve”, “Rama në burg, Berisha në burg”, ishin disa nga thirrjet.

Tubimi i sotëm ka vijuar me mesazhe dhe deklarata nga qytetarë e përfaqësues të protestës, ndërsa në përfundim të fjalimeve pjesëmarrësit janë zhvendosur në formë marshimi përgjatë bulevardit, me këngë, slogane, thirrje, parulla e pankarta, duke mos munguar flamujt dhe simbolet kombëtare.

Me thirrjen “Nesër më shumë!”, protestuesit kanë paralajmëruar vijimin e tubimit nesër.

“Shqipëria e shqiptarëve, vdekje tradhtarëve”, “Shqipëria kërkon revolucion”, “Ndryshim sistemi, Avni Rustemi”, ishin thirrjet e tjera gjatë marshimit që kaloi nga Bulevardi te zona e “Shallvareve” e më tej bulevardi “Gjergj Fishta” apo “Ura e Bllokut”.

gijotina.com/