Zbardhen detaje të reja nga ngjarja e rëndë e ditës së djeshme në Metoq të Sarandës. Në dëshminë e saj në polici, 49-vjeçarja Elvira Tahiraj ka pranuar se ishte ajo që ka kryer vrasjen e të shoqit, Llazar Tahiraj.
49-vjeçarja, gjakftohtë, por në dukje me probleme të shëndetit mendor dëshmoi se edhe në një rast tjetër ka tentuar të vrasë burrin e vet, ndërsa nuk ka treguar asnjë arsye se pse.
Mësohet se ka qenë vajza e çiftit ajo që e ka gjetur të atin rreth orës 08:00 të pajetë dhe të rrethuar nga një pellg gjaku në shtatin e tij.
Pasi ka kërkuar për të nënën dhe e ka gjetur në derën e jashtme të shtëpisë, vajza ka telefonuar të motrën duke i rrëfyer se çfarë kishte ndodhur.
Sipas një komshiu të lagjes 49-vjeçarja kishte rreth orës 04.00 të mëngjesit që rrinte jashtë tek dera.
“Unë u ngrita për të shkuar tek shtëpia e babait tim që ishte i sëmurë dhe e pashë atë që rrinte tek dera dhe nuk reagoi fare kur kalova. U habita po nuk më shkoi në mend se çfarë mund të kishte ndodhur”, u shpreh ai.
Mjeku ligjor i Sarandës tha se viktima është goditur në kokë dhe kishte shumë rrjedhje gjaku. 49-vjeçarja Elvira Tahiraj do dalë ditën e enjte para gjykatës për t’u njohur me masën e sigurisë.
Discussion about this post