Pas pushimeve verore të kaluara në atdhe, emigrantët shqiptarë që jetojnë dhe punojnë në Greqi kanë nisur kthimin drejt vendit ku jetojnë, në ditët e fundit të gushtit.
Këtë të hënë, në pikën kufitare të Qafë Botës është shënuar një fluks i lartë udhëtarësh dhe automjetesh. Pala shqiptare po punon me tre sportele në dalje dhe dy në hyrje, ndërsa pala greke ka vetëm një sportel në hyrje, duke shkaktuar vonesa dhe ngadalësuar ndjeshëm lëvizjen.
Udhëtarët shprehen se procedurat në anën shqiptare janë kryer pa vonesa, ndërsa sipas tyre, pritjet e gjata shkaktohen nga kontrollet në anën greke të kufirit.
“Te dogana shqiptare kaluam menjëherë, ndërsa vonesat janë në anën greke, si gjithmonë. Kemi 30 minuta që kemi vulosur pasaportat nga pala shqiptare dhe jemi te stopuar sepse andej nga greku nuk punohet” shprehet një prej udhëtarëve, i cili kërkon ndërhyrjen e autoriteteve përkatëse.
Sipas tij, radha e automjeteve është kilometrike dhe në pritje ndodhen edhe fëmijë e të moshuar, të cilët detyrohen të qëndrojnë për orë të tëra në kufi.
Udhëtarët kërkojnë marrjen e masave për përshpejtimin e procedurave dhe shmangien e pritjeve të gjata, veçanërisht në këto ditë të fluksit të kthimit të emigrantëve.
Discussion about this post