Kryeministri Edi Rama ka udhëtuar këtë të mërkurë drejt Brukselit për t’u takuar me Sekretarin e Përgjithshëm të NATO-s, Jens Stoltenberg. Pas takimit, kryeministri dhe Sekretari i Përgjithshëm i NATO-s, Jens Stoltenberg, pritet të mbajnë një konferencë të përbashkët për shtyp.
Në qendër të bisedës mes tyre pritet të jetë porti ushtarak i Porto Romanos, kur vetë kreu i qeverisë ka njoftuar për instalimin e një baze navale të NATO-s në Portin e ri të Durrësit që do të jetë në Porto Romano.
Më herët për këtë projekt kryeministri Rama ka deklaruar se ka një vlerë të jashtëzakonshme për vendin tonë.
“Kemi folur për projektin tonë, do rikthehemi në Bruksel për të vazhduat diskutimin lidhur me propozimin tonë që ka ngjallur jo vetëm interes, por edhe dëshirë për të thelluar bisedimet për instalimin e një baze navale të NATO-s në portin e Durrësit, që do jetë në Porto Romano dhe që përveç pjesës komerciale tregtare, parashikohet të ketë edhe një pjesë ushtarake”, u shpreh Rama disa ditë më parë.
Discussion about this post