“Pasi largohesh nga Reali i Madridit, vjen fundi”, kjo frazë e thënë nga mesfushori kroat Luka Modriç, pas largimit të Cristiano Ronaldos nga klubi mbretëror, te Juventusi, po merr jetë përsëri, për një tjetër nga ish-legjendat e rekordmenëve të Spanjës e botës.
Sergio Ramos i dha lamtumirën PSG-së në fund të edicionit sportive 2022-2023 pasi palët nuk rinovuan marrveshjen mes tyre, kjo gjë e ndikuar edhe nga dëmtimet e vuajtura nga mbrojtësi (sidomos në vitin e parë në Paris). U përfol për shumë klube të interesuara për mbrojtësin spanjoll, por për momentin ai ka mbetur në shtëpi, pa një destinacion të qartë për të ardhmen e tij.
Mediat spanjolle kanë bërë të ditur se në fakt Ramos kishte piketuar një kthim të bujshëm në vendlindje. Ai kishte shprehur gatishmërinë që të bashkohej me Seviljen, klubi ku u bë i famshëm, teksa ishte gati të bënte sforco të rëndësishme financiare duke ulur pretendimet e tij ekonomike.
Por, fituesit e Europa League, e kanë hedhur poshtë këtë ide, ndonëse ky i fundit kishte bërë të qartë se ishte gati të paguhej edhe me “bonuse objektivash”, si numër ndeshjesh të luajtura apo në bazë të klasifikimit në kampionat dhe kompeticionet ndërkombëtare.
Zëvendëspresidenti i klubit, Jose Maria Del Nido, deklaroi publikisht se nuk ka asnjë mundësi që Ramos të kthehet te Sevilla, ku është formuar si futbollist. Edhe Viktor Orta, drejtori sportiv, përsëriti të njëjtën gjë. “Me modelin e skuadrës që kemi, nuk ekziston asnjë mundësi që ai të vijë, pasi kemi 6 mbrojtës qendre. Me një numër të tillë futbollistësh në këtë pozicion, nuk ekziston mundësia për të folur me të”, tha ai, duke bërë të qartë se nuk kishte në plane Ramosin.
Discussion about this post