Asociacioni i Gazetarëve të Shqipërisë (AGSH) ka reaguar në lidhje me episodin e përplasjes fizike të regjistruar këtë të hënë mes efektivëve të policisë dhe gazetarëve, në ambjentet pranë Kuvendit.
Sipas AGSH-së, nga pamjet filmike dhe informacionet e mbledhura në terren rezulton se punonjës të Policisë së Shtetit kanë goditur fizikisht gazetarin e Ora News, Edison Vatnikaj, në momentin kur ai po filmonte shoqërimin e një protestuesi.
“Asociacioni i Gazetarëve të Shqipërisë dënon me forcë dhunën e ushtruar nga efektivët e Policisë së Shtetit ndaj gazetarit të Ora News, Edison Vatnikaj. Ky është një akt i rëndë dhe i papranueshëm, që përbën një cenim të drejtpërdrejtë të lirisë së medias dhe të së drejtës së publikut për t’u informuar”, thuhet në reagim.
AGSH thekson se gazetarët kanë të drejtën dhe detyrimin të dokumentojnë ngjarjet me interes publik, pa u përballur me dhunë, intimidim apo pengesa nga autoritetet.
Sipas organizatës, incidenti nuk ishte një rast i izoluar. Gjatë raportimit të protestës, edhe ekipe të tjera mediatike janë penguar në ushtrimin e detyrës së tyre, duke u përballur me ndërhyrje dhe kufizime të pajustifikuara nga efektivët.
Në deklaratë thuhet se këto veprime përbëjnë një përshkallëzim serioz të presionit ndaj medias.
AGSH i bën thirrje Agjencisë së Mbikëqyrjes Policore (AMP) të nisë hetimet për ngjarjen dhe të vendosë përpara përgjegjësisë ligjore efektivët e përfshirë në ushtrimin e dhunës ndaj gazetarëve.
Discussion about this post