Ish-deputeti demokrat, Ervin Salianji, ka reaguar në lidhje me bllokimet e disa profileve në rrjete sociale, që kanë pasqyruar protestën kundër qeverisë së Edi Ramës.
Në një reagim në rrjete sociale, ai shkruan se qeveria në vend që të luftojë krimin, merret me kundërshtarët e saj në Instagram.
Salianji përmend situatën me krimin në vend, duke shtuar se qeveria ua ka lëshuar autoritetin mbi territor bandave kriminale.
Ai shton se Rama duhet të japë dorëheqjen.
“Kjo qeveri nuk e kontrollon territorin, nuk garanton sigurinë dhe nuk lufton krimin, por merret me kundërshtarët politikë, agonia qeverisëse duket qartë, Edi Rama ka humbur autoritetin për të qeverisur.”, shkruan ai.
REAGIMI I PLOTE:
Në vend që të luftojë krimin, qeveria lufton kundërshtarët në Instagram.
Shqipëria sot duket si një vend pa zot, pa qeveri dhe pa autoritet shtetëror. Nga jugu në veri kanë plasur armët dhe konfliktet po zgjidhen me ligjin e më të fortit.
Qeveria e ka humbur kontrollin në territor dhe ua ka lëshuar autoritetin bandave kriminale. I shfrytëzon për zgjedhje, i majm me pushtet e privilegje e vjen një moment kur bandat nuk mjaftohen më duke ushtruar pushtetin e tyre brenda shtetit por sfidojnë vetë shtetin.
E ndërsa Shqipëria përballet me pasiguri, armë dhe dhunë, qeveria ka një prioritet tjetër, të mbyllë Instagramin e protestuesve dhe të luftojë zërat kundër saj.
Kjo qeveri nuk e kontrollon territorin, nuk garanton sigurinë dhe nuk lufton krimin, por merret me kundërshtarët politikë, agonia qeverisëse duket qartë, Edi Rama ka humbur autoritetin për të qeverisur.
Rama, jep dorëheqjen!
Discussion about this post