Një organizatë kriminale transnacionale që dyshohet se trafikonte kanabis nga Shqipëria drejt Turqisë është goditur në Selanik.
Operacioni u zhvillua të premten nga autoritetet greke, në kuadër të hetimeve për trafikun ndërkombëtar të narkotikëve.
Në pranga kanë përfunduar dy shtetas të huaj, 58 dhe 43 vjeç, ndërsa një person i tretë është shpallur në kërkim.
Sipas hetimeve, grupi përdorte kamionë të transportit ndërkombëtar për të kaluar sasitë e drogës përmes Greqisë.
Kanabisi fshihej në hapësira të posaçme të krijuara brenda ngarkesave me materiale letre për riciklim.
Gjatë kontrollit në një zonë të mbyllur në Selanik, policia zbuloi tetë paleta me materiale për riciklim.
Katër prej tyre ndodheshin brenda një automjeti gjysmërimorkio, ndërsa pjesa tjetër pranë tij.
Në hapësirat e fshehura u gjetën pako me kanabis të papërpunuar me peshë totale 324 kilogramë e 474 gramë.
Autoritetet sekuestruan gjithashtu një automjet gjysmërimorkio, dy automjete private dhe dy telefona celularë.
Në listën e sendeve të sekuestruara ishin edhe 11 valixhe bosh, një targë automjeti të huaj dhe 1,165 euro.
Sipas policisë greke, fitimi i paligjshëm nga trafikimi i kësaj sasie droge pritej të kalonte 700 mijë euro.
Hetuesit dyshojnë se personi i shpallur në kërkim koordinonte aktivitetin kriminal në territorin grek.
Ndërkohë, dy të arrestuarit dyshohet se kishin role në marrjen, fshehjen dhe transportimin e kanabisit.
Hetimet vijojnë për identifikimin dhe kapjen e bashkëpunëtorëve të tjerë të dyshuar në Shqipëri, Greqi dhe Turqi.
Discussion about this post