Një konflikt i dhunshëm i ndodhur mbrëmjen e së dielës në qytetin e Fier ka përfunduar me dy persona të plagosur, ndërsa policia ka shpallur në kërkim një 36-vjeçar, i dyshuar si një nga autorët e ngjarjes.
Sipas burimeve zyrtare, rreth orës 23:00, në spitalin rajonal të Fierit kanë mbërritur për ndihmë mjekësore shtetasit Renato Hoxha, 28 vjeç, dhe Devi Hoxha, 28 vjeç. I pari ka marrë dëmtime në kokë të shkaktuara me sende të forta, ndërsa i dyti ka mbetur i plagosur me mjet prerës.
Nga hetimet paraprake rezulton se ngjarja ka ndodhur pas një konflikti të çastit mes disa personave, i cili më pas ka degraduar në përdorimin e dhunës dhe mjeteve prerëse.
Policia ka identifikuar si një nga personat e përfshirë shtetasin me iniciale K. S., 36 vjeç, banues në fshatin Vadhizë, i cili është shpallur në kërkim për përfshirje në konflikt.
Materialet procedurale i janë referuar Prokurorisë për veprime të mëtejshme.
Discussion about this post