Kualifikimi në çerekfinale të Kupës së Shqipërisë ka rritur moralin në radhët e skuadrës së Dinamos. Trajneri Bledi Shkëmbi ka analizuar vigjiljen e duelit me Egnatian teksa ka theksuar se kërkon që lojtarët e tij të tregojnë karakter në fushë.
“Është normale që pas 120 minutave lodhja fizike por dhe psikologjike, ka të bëjë pak, por jemi në një moment që nuk duhet të shfajësohemi dhe të mos mendojmë për lodhjen, por të bëjmë maksimumin për t’u rikthyer tek fitoret në kampionat. Duhet të ndryshojmë shumë, sidomos karakterin në momente të caktuara të ndeshjes, por dhe besimin.
Egnatia është një nga kundërshtart më të vështirë. Ka një trajner që ka shumë eksperiencë dhe e njeh shumë mirë kampionatin shqiptar. Jam i bindur që do e kemi të vështirë, pasi kemi pasur fatin ta shohim pas çdo jave.
Për mendimin tim ne duhet të ndryshojmë mënyrën si kemi luajtur në dy ndeshjet e fundit, pasi kemi mundësitë dhe cilësitë për të bërë ndeshje të mira dhe për tu rikthyer tek fitorja.
Nuk mund të them se i druhemi Egnatian. Në futboll ndodh që një skuadër mund të mundë skuadrën më të mirë të kampionatit dhe ti shkon edhe e mund. Ndeshjet nuk janë asnjëherë njësoj. Këto rezultate për Egnatian tregojnë se duhet ta respektojmë dhe duhet të bëjmë mbi 100% për të arritur fitoren”, tha Shkëmbi.
Discussion about this post