Në një kohë kur prej dy muaj e gjysmë po flitet për fatin e mistershëm të zhdukjes pa adresë të biznesmenit Ervis Martinaj, prokuroria e Kurbinit, përmes një shkrese zyrtare ka habitur familjarët e këtij të fundit. Në 28 shtator 2022, mësohet se në adresën e shtëpisë së Ervis Martinaj në Fushë-Kuqe, ka mbërritur një dokument, ku i kërkohet Martinajt që të paraqitet në ambientet e prokurorisë Laç, me qëllim marrjen në pyetje të tij, lidhur me ngjarjen e datës 2 Tetor 2021.
Pikërisht në këtë datë, Martinaj është kallëzuar në komisariatin e Laçit, nga një person i këtij qyteti, i cili pretendon se është dhunuar dhe më pas “kanosur” me jetë nga Ervis Martinaj. Denoncimi është i një viti më parë, por kur janë mbushur 11 muaj nga ky kallëzim, rezulton se prokuroria e Laçit ka kërkuar në 28 shtator marrjen në pyetje të Martinaj dhe sqarimin e situatës nga ana e biznesmenit të lojërave të fatit.
Kryerja e këtyre veprimeve nga ana e prokurorisë së Laçit, po kryhen në një kohë kur qysh prej datës 8 Gusht të këtij viti, ndaj Martinajt nuk dihet asnjë e dhënë se ku ndodhet. Aq më tepër që kjo çështje ka hyrë në një spirale paradoksale, pasi është vetë prokuroria e Laçit që po heton rrëmbimin e Ervis Martinajt dhe nga ana tjetër është e njëjta prokurori, që i dërgon fletë-thirrje biznesmenit Ervis Martinaj, për tu paraqitur në prokurorinë e rrethit.
Zhdukja apo rrëmbimi i Ervis Martinajt, tashmë dihet nga të gjitha strukturat inteligjente në Shqipëri, të cilat janë duke kryer një sërë veprimesh hetimore, për të mësuar të vërtetën e humbjes së kontakteve me familjarët dhe miqtë e tij të afërt. Por pavarësisht se ndaj Martinajt nuk është gjendur asnjë e dhënë, sërish ai vijon të mos jetë shpallur si person i zhdukur. Dhe nisur nga këto të dhëna edhe hetimet kundër tij që kanë nisur në prokurorinë e Laçit dhe prokurorinë e posaçme SPAK, nuk janë pushuar.
Martinaj humbi kontaktet në 8 Gusht 2022, teksa ndodhej në qytetin e Shijakut, ku kishte shkuar të takonte një anëtar të fisit Avdylaj në këtë zonë. Pikërisht në këtë zonë ai ka humbur çdo kontakt dhe që prej asaj dite nuk ka asnjë të dhënë mbi vendndodhjen e tij. Policia e Shtetit dhe prokuroria e Laçit kanë vijuar hetimet, por kontrolli i banesave dhe shumë veprime të tjera nuk kanë sjellë asnjë rezultat pozitiv për zbardhjen e ngjarjes. Ndërkohë vetëm pak ditë pas zhdukjes së biznesmenit Ervis Martinaj, Policia e Shtetit në fillim të muajin Shtator 2022, vendosi të arrestojë punonjësin e operacionales Jeton Lami, i cili rezultoi të kishte shoqëruar për një kohë të gjatë Ervis Martinaj dhe persona të tjerë të grupit të tij.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post