Shtyhet seanca për Mediun, Gjykata gjobit avokatët e ish-ministrit

Seanca në GJKKO ndaj ish-ministrit të Mbrojtjes Fatmir Mediu është shtyrë sërish.

Shkak është bërë mungesa e dy avokatëve mbrojtës të cilët kishin paraqitur si arsye se ishin të angazhuar në procese të tjera.

Gjykata i gjobiti të dy ata me 5 mijë lekë të reja, pasi mungesa e tyre u bë shkak për shtyrjen e procesit.

Seanca e radhës u caktua në datë 18 dhjetor, ora 09:00.

Mediu është marrë i pandehur për “shpërdorim detyre” të kryer në bashkëpunim, për ngjarjen e ndodhur në 15 mars 2008 në fshatin Gërdec, ku pas një shpërthimi në fabrikën e demontimit të armëve, humbën jetën 26 persona.

Çështja për Mediun u hap nga kallëzimi i familjes Durda, e cila humbi fëmijën në tragjedinë e Gërdecit.

Vetë Mediu i ka mohuar akuzat dhe e ka cilësuar çështjen politike.