Në lidhje me situatën e tensionuar mes Kosovës dhe Serbisë për çështjen e targave, ka reaguar edhe kreu i Partisë Demokratike, Lulzim Basha.
Me anë të një statusi në Twitter, Basha thotë se gjuha kërcënuese e Beogradit i përket të shkuarës që nuk kthehet më. Ai thotë se këtë gjë Serbia duhet ta kuptojë një orë e më parë, sepse është në të mirë të saj dhe marrëdhënieve mes vendeve të rajonit.
“Gjuha kërcënuese e Beogradit i përket një të shkuare që askush nuk e kthen dot më! Kosova është shtet i pavarur dhe marrëdhëniet mes dy shtetesh sovrane funksionojnë mbi baza reciprociteti. Kjo është e drejtë e patjetërsueshme e Kosovës. Sa më shpejt ta kuptojë këtë Beogradi aq më mirë do të jetë për Serbinë dhe për marrëdhëniet mes vendeve të rajonit. Qëndrimet e Beogradit ndaj vendimit legjitim dhe që nuk cenon asnjë marrëveshje të nënshkruar në Bruksel nga qeveria e Republikës së Kosovës, zbulojnë qëllimet e vërteta të Vuçiç dhe fshehjen pas fallsitetit të iniciativës së Novi Sadit” – shkruan Basha.
Kujtojmë që prej vendimit të qeverisë së Kosovës, për zbatimin e reciprocitetit në kufi mbi targat e përkohshme, situata ka sjell reagime të forta mes Kosovës dhe Serbisë, ku forcat e policisë në kufi janë shtuar në mënyrë të ndjeshme. Mjete të blinduara dhe forca speciale janë stacionuar në doganë, që pas protestës së djeshme të qytetarëve serbë.
