Shqipëria vijon të jetë nën një situatë kritike për shkak të zjarreve masive, me 38 vatra të reja të evidentuara në 24 orët e fundit, nga të cilat 14 janë aktualisht aktive në disa qarqe të vendit. Raporti ditor i Agjencisë së Mbrojtjes Civile thekson se përballimi i flakëve po bëhet me angazhim të madh të forcave operacionale, duke përfshirë ndihmë ndërkombëtare dhe evakuime të banorëve.
Vatra më problematike mbetet në Qarkun e Vlorës, ku zjarri ka avancuar në fshatin Krane dhe Leshnicë e Poshtme në bashkinë Finiq. Për shkak të rrezikut, banorët janë evakuuar. Në operacionin gjigant janë angazhuar qindra efektivë të zjarrfikësve, Policisë, Forcave të Armatosura dhe vullnetarë, ndërsa nga ajri po ndihmon edhe një avion kroat Canadair. Gjithashtu, zjarre aktive raportohen në Bolenë dhe Lukovë të bashkisë Himarë, ku po punohet intensivisht për shuarjen e tyre.
Zjarre të tjera aktive dhe rreziku i lartë në të gjithë vendin
Situata mbetet e tensionuar edhe në qarqe të tjera:
- Qarku Berat: Në Poliçan, zjarri rrezikon një azil pleqsh dhe banesa. Janë mobilizuar forca të shumta tokësore nga disa bashki dhe mbështetje nga ajri.
- Qarku Tiranë: Vatër aktive ka në Malin e Bërzhitës dhe në fshatrat Ballaj dhe Zhabjak të Rrogozhinës. Në Rrogozhinë, një ndërhyrje e shpejtë me helikopter shpëtoi mbi 50 banesa, ku zjarri kishte arritur deri në oborre.
- Qarku Elbasan: Në Mukaj të Gramshit, zjarri rrezikon banesat, ndërsa në Cërrik një vatër tjetër është izoluar.
- Qarku Lezhë dhe Dibër: Zjarret në Mirditë dhe Malin e Allushit janë nën kontroll, por monitorohen nga afër.
- Qarku Durrës: Një zjarr në Malin e Krujës është izoluar, me intensitet të ulur.
Ndihma ndërkombëtare dhe parashikimet e IGJEO-s
Në operacionet e shuarjes, krahas forcave vendase, janë angazhuar edhe burime të huaja. Përveç avionit kroat Canadair, kanë operuar edhe një avion italian, si dhe helikopterët e Forcave Ajrore Çeke dhe Sllovake. Për shkak të situatës së rëndë, në vend janë vënë në dispozicion edhe dy helikopterë Black Hawk nga Forca Ajrore e Emirateve të Bashkuara Arabe.
Sipas parashikimeve të IGJEO, për ditën e sotme pritet një nivel rreziku “I LARTË” në të gjitha qarqet dhe “SHUMË I LARTË” në disa zona të lokalizuara, si në Shkodër, Lezhë dhe Elbasan. Me temperatura që pritet të arrijnë deri në 42 °C, autoritetet ripërsërisin thirrjen për kujdes maksimal ndaj qytetarëve.
Discussion about this post