Një nga vendimet e marra sot në mbledhjen e Këshillit të Ministrave që qeveria e re e Shqipërisë ka publikuar është krijimi i Agjencisë për Media dhe Informim.
Sipas njoftimit, Agjencia për Media dhe Informim (MIA) me seli në Tiranë është në varësi të kryeministrit dhe do të financohet nga buxheti i shtetit.
Mesa duket pas ATSH, TVSh, kryeministria.al qeveria ka vendosur të krijojë një tjetër agjenci, pra një tjetër “mjet” për propagandë, për të reklamuar aktivitetet, projektet apo eventet që organizon qeveria e tyre.
“V E N D O S I:
I. DISPOZITA TË PËRGJITHSHME
1. Krijimin, organizimin dhe funksionimin e Agjencisë për Media dhe Informim (më poshtë “Agjencia”) e njohur për publikun edhe si “Media and Information Agency – MIA”, si person juridik publik, në varësi të Kryeministrit, me seli në Tiranë.
2. Agjencia financohet nga buxheti i shtetit, donacione dhe burime të tjera të ligjshme.
3. Agjencia ka si mision të sigurojë transparencën në lidhje me politikat, aktivitetet, projektet, eventet, si dhe qëllimin, objektivat, risitë apo problematikat që zgjidhen nëpërmjet akteve të Këshillit të Ministrave dhe të akteve të tjera të ministrave dhe çdo institucioni të administratës shtetërore”, thuhet në njoftim.
Kryeministri Edi Rama dhe 16 ministrat e qeverisë re u betuan mëngjesin e sotëm para presidentit Ilir Meta për katër vitet e ardhshme në pushtet.
Pas betimit, kabineti “Rama 3” u nisën në këmbë drejt Kyreministrisë për të vijuar me mbledhjen e parë qeveritare, dhe foton zyrtare, që ndryshe nga herët e tjera që bëhet në Presidencë, këtë herë u shkrep në shkallët e Kryeministrisë.
Mbledhja e parë e qeverisë, sipas protokollit u nis nga kryeministri Rama, i cili i njohu ministrat me Kodin Etik që duhet të respektojnë, përfshirë ndalimin e udhëtimeve të luksit, dhuratat, apo përdorimi i makinës së punës.
